Read Te Tusi Tapu I Te Gana Tuvalu Lomiga Lua SALAMO 25 Bible Online

SALAMO 25 - Te Tusi Tapu I Te Gana Tuvalu Lomiga Lua bible

SALAMO 25

¹[31] Te Aliki, au e talo atu ki a koe;

²A koe ko toku Atua e fakatuaga au ki ei. Fakasao mai au mai te masiasi o te takavale; Sa faigina oku fili ke katakata mai ki a au!

³A latou kola e talitonu ki a koe, E se mafai o oko ki a latou te takavale, Kae oko fua ki a latou kola e 'teke ki a koe.

⁴Te Aliki, akoako mai ki a au ou auala; Fakaasi mai foki ke iloa 'lei ne au.

⁵Akoako mai au ke ola i tau munatonu; Me i a koe ko toku Atua, tela e fakasao ne ia au. Au e talitonu faeloa ki a koe.

⁶Te Aliki, ke manatua tou aga'lei mo tou alofa tumau, Tela ne fakaasi ne koe i aso taumua.

⁷Fakamagalo mai aku agasala mo aku mea 'se ne fai i aso koi tamataene ei au. Te Aliki, ke manatua mai au i tou alofa tumau mo tou atafai!

⁸A te Aliki e amiotonu kae 'lei, E akoako ne ia a tino agasala ki te auala e 'tau o tautali i ei.

⁹E takitaki ne ia a tino loto maulalo ki te auala tonu Kae akoako foki ne ia a latou ki tena kanoloto.

¹⁰E takitaki ne ia ki te alofa mo te fakamaoni a latou katoa kola e tausi ki tena feagaiga mo ana fakatonuga.

¹¹Te Aliki, tausi ki tau tautoga kae fakamagalo mai aku agasala me ko oko eiloa i te uke.

¹²A latou kola e faka'logo ki te Aliki ka iloa ne latou mai i a ia te auala e 'tau o tau'tali latou i ei.

¹³Ka maua ne latou te olaga maumea, Ka ko olotou fanau foki ka fai mo latou te fenua.

¹⁴A te Aliki ko te taugasoa o tino kola e faka'logo ki a ia, Kae fakamautakitaki foki ne ia tena feagaiga mo latou.

¹⁵E fakasaga oku mata ki te Aliki mō se fesoasoani i taimi katoa, Kae fakasao ne ia au mai fakalavelave.

¹⁶Te Aliki, saga mai ki a au, kae alofa mai foki ki a au, i a au e tokotasi kae vaivai.

¹⁷Ave keatea a mea katoa e fakalavelave i toku loto, Kae fakasao mai au i oku puapuaga katoa.

¹⁸Mafaufau mai ki oku fi'taga mo oku puapuaga Kae fakamagalo mai aku agasala katoa.

¹⁹Kilo mai ki te tokouke oku fili; Ko oko eiloa i te takalialia mai ki a au.

²⁰Puipui mai kae fakasao mai au; Tausi mai ke moa e takavale au. Au e fanatu ki a koe mō se fakaolataga.

²¹Ko toku lei mo toku fakamaoni e ola ei au, i a au e talitonu ki a koe.

²²Te Atua, fakaola tou fenua ko Isalaelu mai olotou puapuaga katoa!