Read Te Tusi Tapu I Te Gana Tuvalu Lomiga Lua SALAMO 27 Bible Online

SALAMO 27 - Te Tusi Tapu I Te Gana Tuvalu Lomiga Lua bible

SALAMO 27

¹[34] A te Aliki ko toku mainaga mo toku fakaolataga; E seai se tino e mataku au ki ei. A te Aliki e puipui ne ia a au mai mea faigata katoa; Ka se mataku lele eiloa a au.

²Kafai e faitaua mai a tino amio ma'sei ki au, Kae taumafai o tamate au, Ka takase'se latou kae siga.

³E tusa eiloa me nikoi au ne se kautau lasi, Au se mataku lele eiloa; E tusa eiloa me faitaua mai oku fili ki a au, E tumau eiloa toku fakatuanaki ki te Atua. [35]

⁴E tasi faeloa te mea ne fakatagi atu ei au ki te Aliki; E tasi foki eiloa te mea e manako au ki ei: Ke nofo au i te fale o te Aliki i toku olaga katoa, Ko te mea ke ofo au i te 'lei katoatoa o te Aliki, Kae fakatagi atu ki tena takitakiga.

⁵I taimi o fakalavelave, e fakamalu ne ia a au; E tausi foki ne ia au ke sao i loto i tena Faletapu, Kae fakanofo ne ia a au i luga i se kaupapa maluga e sao 'lei ei au.

⁶Tela, ka manumalo ei au i oku fili kola e nikoi mai au. E ofo atu ne au a taulaga mo te leo fiafia i loto i tena Faletapu, Kae ka usu foki ne au a pese e tavae ei ki te Aliki.

⁷Te Aliki, fakalogo mai ki toku leo ma kalaga atu au ki a koe! Alofa mai kae tali mai ki a au!

⁸Ne fai mai koe ki a au penei, “Vau o tapuaki mai ki a au,” Kae ne tali atu au penei, “Te Aliki, au ka fanatu ki a koe;

⁹Sa 'muni mai i a au!” Mo a koe ma ita mai ki a au; Sa afuligina keatea tau tavini. A koe ko toku fesoasoani; Te Atua, toku fakaola, sa tuku tiakina mai au!

¹⁰E mafai ne toku tamana mo toku matua o tiakina au, Ka ko te Aliki ka tausi ne ia a au.

¹¹Te Aliki, akoako mai ki a au mea kola e loto koe ki ei ke fai ne au, Takitaki mai ki te auala e sao ei au, i te mea e tokouke oku fili.

¹²Sa tuku tiakina atu au ki oku fili kola e kaitaua mai ki a au i muna 'loi mo fakamatakutakuga.

¹³E mautinoa ne au i a au e ola eiloa ke lavea ne au te aga'lei o te Aliki i te olaga nei.

¹⁴Talitonu ki te Aliki. Fakatuanaki ki a ia kae sa loto vaivai. Talitonu ki te Aliki.