Read Te Tusi Tapu I Te Gana Tuvalu Lomiga Lua SALAMO 29 Bible Online

SALAMO 29 - Te Tusi Tapu I Te Gana Tuvalu Lomiga Lua bible

SALAMO 29

¹[37] A koutou atua, viki atu ki te Aliki; Viki atu ki tena 'malu mo tena 'mana.

²Viki atu ki te igoa 'malu o te Aliki; ifo atu ki mua o te Tasi Tapu manafai e sae mai a ia.[38]

³E lagona te leo o te Aliki i luga o te tai; A te Atua 'malu ko 'gulu mai, A tena leo ko oko atu ki luga i te moana.

⁴Ko lagona te leo o te Aliki i tena malosi katoatoa mo tena'malu fakatupu.

⁵E fatifati ne te leo o te Aliki a lakau ko alasi, E oko foki eiloa ki alasi o Lepanona.

⁶E fakagasue ne ia te atu mauga o Lepanona ke evaeva pela me ne tama pulumakau, Mo te Mauga o Helemoni ke tafukefuke pela me se tama pulumakau tagata.

⁷A te leo o te Aliki e faka'lapa ne ia te uila.

⁸E galulu te toafa i tena leo: E galulu ei foki te toafa o Katesa.

⁹A te leo o te Aliki e fakagalulu ne ia a lakau ko te oka,[39] E mulu fakapalele ei foki a lau o lakau, Kae i loto o tena Faletapu e ka'laga katoa tino penei: “Ke i te Atua te 'malu!”

¹⁰A te Aliki e pule i luga i moana poko; E pule foki a ia pela me se tupu ki te se gata mai.

¹¹E aumai ne te Aliki te malosi ki ona tino Kae fakamanuia foki ne ia latou ki te filemu.