Read Te Tusi Tapu I Te Gana Tuvalu Lomiga Lua SALAMO 33 Bible Online

SALAMO 33 - Te Tusi Tapu I Te Gana Tuvalu Lomiga Lua bible

SALAMO 33

¹Ke fiafia koutou tino amiotonu, E tusa mo mea ne fai ne te Aliki; Tavae atu ki a ia koutou katoa kola e faka'logo ki a ia.

²Fakafetai atu ki te Aliki i kitala, usu te pese ki a ia i lakau ta'ta.

³Viki atu ki a ia i te pese fou, Ta faka'lei te kitala kae ka'laga fiafia!

⁴E tonu a muna a te Aliki; E fakatuagagina foki ana galuega katoa.

⁵E fiafia te Aliki ki te amiotonu mo te fai mea tonu; E fonu te lalolagi i tena alofa tumau.

⁶Ne faite ne te Aliki a lagi ki tena fakatonuga, Ko tena muna foki ne faite ei ne ia te la, te masina, mo fetū.

⁷Ne fakaakutu ne ia a tai katoa ki te koga e tasi, Ne tuku ne ia te moana poko ki te koga e nofo mau i ei.

⁸Ma'taku ki te Aliki, te lalolagi katoa! Fakaaloalo atu foki ki a ia tino katoa o te lalolagi!

⁹I te taimi ne faipati ei a ia, ko te lalolagi eiloa ko tu mai; Ko tena fakatonuga foki ne 'sae ake ei a mea katoa.

¹⁰E fakaseaoga ne te Aliki a fakamoemoega o malo; E fakagata foki ne ia olotou fuafuaga.

¹¹Ka ko ana fuafuaga e tumau ki te se gata mai; Ko ona fakamoemoega foki seai se gata maiga.

¹²Amutia te malo tela e fai te Aliki mo olotou Atua; Amutia foki tino ko oti ne filifilia ne te Aliki mo ia!

¹³E kilokilo ifo te Aliki mai te lagi, Lavea ei ne ia tino katoa.

¹⁴E kilokilo ifo foki a ia mai te koga e pule ei a ia, ki tino katoa kola e ola i te lalolagi.

¹⁵Ne faite ne ia olotou mafaufauga katoa, E iloa foki ne ia olotou mea katoa e fai.

¹⁶E se manumalo se tupu i te malosi o tena kautau; E se manumalo foki se sotia i tena malosi.

¹⁷A solofanua tau e se maua i ei se manumalo; Te lotou malosi katoatoa foki e se 'sao ei ne tino.

¹⁸E leoleo ne te Aliki a latou kola e ma'taku ki a ia, Mo latou foki kola e fakatuanaki ki tena alofa tumau.

¹⁹E fakaola ne ia latou mai te mate; E tausi foki ne ia latou ke ola i te taimi o te oge.

²⁰A tatou e fakamoemoe ki te Aliki, Me ko ia ko te tou fesoasoani mo te tou puipuiga.

²¹E fiafia tatou ki a ia; E fakatuanaki foki tatou ki tena igoa tapu.

²²Te Aliki, ke i luga i a matou tou alofa tumau e pela mo te motou fakamoemoe atu ki a koe.