Read Te Tusi Tapu I Te Gana Tuvalu Lomiga Lua SALAMO 34 Bible Online

SALAMO 34 - Te Tusi Tapu I Te Gana Tuvalu Lomiga Lua bible

SALAMO 34

¹[44] Au e fakafetai faeloa ki te Aliki; E se gata eiloa aku tavaega ki a ia.

²Ka tavae atu au ki a ia i ana mea ne fai; Ke faka'logo kae fiafia a tino katoa kola e puapuagatia!

³Ke takutaku fakatasi atu ne tatou te malu o te Aliki; Ke tavae foki fakatasi tatou ki tena igoa!

⁴Au ne talo ki te Aliki kae ne tali mai a ia ki a au; Ne fakasao ne ia au i mea katoa ne mataku au ki ei.

⁵A tino puapuagatia ne kilo ki a ia kae fia'fia; Ka se toe fanoa'noa eiloa latou.

⁶Ne ka'laga atu ki a ia a tino puapuagatia kae ne tali mai a ia; Ne fakasao ne ia latou mai olotou puapuaga katoa.

⁷E leoleo ne tena agelu a latou kola e ma'taku ki te Aliki kae fakasao ne ia latou mai mea faiga'ta.

⁸ Mafaufau ake la koe ki te lasi o te aga'lei o te Aliki. Amutia latou kola e faka'lafi atu ki a ia.

⁹Faka'logo ki te Aliki, a ona tino katoa; A latou kola e faka'logo ki a ia e maua faeloa mea e ma'nako latou ki ei.

¹⁰E oko foki eiloa ki leona e likiliki me ko seai ne olotou meakai; Ka ko latou kola e fakalogo ki te Aliki e se mativa i mea 'lei.

¹¹Oku taugasoa tuputupu, o'mai o faka'logo mai ki a au, Ke akoako atu ne au a koutou ke ma'taku ki te Aliki.

¹² E a, e manako koe ki se olaga fiafia? E a, e manako koe ke ola loa kae fiafia?

¹³Sa faipati la ki pati ma'sei mo pati loi.

¹⁴Sa toe fai a mea ma'sei, kae fai mea lei; Taumafai ke maua ne koe te filemu mo tou loto katoa.

¹⁵A te Aliki, e onoono faeloa ki tino amiotonu kae talia foki olotou fakatagi;

¹⁶Kae se fiafia a ia ki a latou kola e fai amioga ma'sei, E vave puli latou mafai e 'mate latou.

¹⁷A tino amiotonu e ka'laga ki te Aliki, Kae e lagona ne ia; e fakasao foki ne ia a latou mai olotou puapuaga katoa.

¹⁸Te Aliki e nofo pili ki a latou kola e loto vaivai, E fakasao foki ne ia a latou kola ko seai ne olotou fakamoemoega.

¹⁹E uke a mea faiga'ta e oko ki te tino amiotonu, Kae fakaola a ia ne te Aliki mai mea katoa kona.

²⁰ E tausi faka'lei a ia ne te Aliki; E seai eiloa se ivi o ia e fati.

²¹Ka tamate ne te masei a tino amio ma'sei; A latou kola e takalialia ki tino amiotonu ka fakasalagina.

²²Ka fakasao ne te Aliki ana tino; A latou foki kola e olo atu ki a ia mō se puipuiga ka fakaolagina.