Read Te Tusi Tapu I Te Gana Tuvalu Lomiga Lua SALAMO 35 Bible Online

SALAMO 35 - Te Tusi Tapu I Te Gana Tuvalu Lomiga Lua bible

SALAMO 35

¹[45] Te Aliki, teke atu ki a latou kola e teke mai ki a au, Kae taua atu ki a latou kola e fai taua mai ki a au!

²Puke ki tau talita mo ou gatu tau kae vau o fesoasoani mai ki a au.

³Sau ake ki luga tau tao mo tau takū o teke atu ki a latou kola e afuli mai au. Taku mai ki a au me ka fakasao ne koe au.

⁴Ke taka'vale kae fakamasiasigina a latou kola e taumafai o tamate au! Ke 'tele valevale o 'foki ki tua a latou kola e mafaufau ki se mea e fakamasei ei au!

⁵Ke pela latou mo mouku pakupaku ko agina ne te matagi, Mafai e afuli latou ne te agelu a te Aliki!

⁶Ke pouli kae molemole te olotou auala, i te taimi e ta ei latou ne te agelu a te Aliki!

⁷Ne 'tao ne latou te malei mo au, Kae keli foki ne latou te lua 'poko ke to au ki ei Kae seai eiloa saku mea 'se ne fai.

⁸Ka oko atu ki a latou te malaia ka koi tuai o iloa ne latou; Ka 'lave eiloa latou i te olotou malei, Ka 'to foki eiloa latou ki te lua ne keli ne latou!

⁹Tena la, e fiafia au ki te Aliki, Kae lifu foki au me ne fakaola ne ia au.

¹⁰Ka faipati atu au ki te Aliki mo toku loto katoatoa, “E seai eiloa se tino e 'pau mo koe. E puipui ne koe tino vaivai mai te malosi o tino 'mafi, Tino ma'tiva mai tino fakasauā.”

¹¹A tino amio ma'sei e molimau 'se ne latou au, Kae taku 'se foki ne latou au i agasala e se iloa ne au.

¹²E taui mai ne latou toku 'lei ki te masei, Ka ko au ko seai eiloa soku fakamoemoega.

¹³Ka ko te taimi ne ma'saki ei latou, Au ne pei ki gatu o te fanoanoa; Ne fakafi'ta toku foitino i te fakalikilikiga; Kae talo foki au mo toku ulu e punou ki lalo,

¹⁴Pela eiloa mō au ma talo mō soku taugasoa io me mo soku taina. Ne fano sale au mo te fanoanoa, E pela me se tino e fanoanoa i te mate o tena matua.

¹⁵Ne fia'fia katoa latou i te taimi ne puapuagatia ei au, Kae ne maopoopo mai foki latou ki oku tafa o fakatauemu mai ki a au; Ne kini au ne tino fakaatea kae ne mau mai faeloa o ta au.

¹⁶Ne pula toka mai ki a au, e pela me ne tino e fakalili ki se tino 'pili.

¹⁷Te Aliki, e saga mai koe ki a au mafea? Fakasao mai au mai te olotou faitaua mai; Fakaola mai au mai leona konei!

¹⁸Tena la, au e fakafetai ki a koe i mua o te fakapotopotoga o ou tino, E viki atu foki au ki a koe i mua o latou katoa.

¹⁹ Mo a mana tuku mai ne koe oku fili, Ke kata fakatauemu mai ki toku takavale, i latou ne tino 'lei. Mo a foki e tuku mai ne koe latou kola e ita tauanoa mai ki a au, Ke katakata fakatauemu mai ki toku fanoanoa!

²⁰E se faipati latou ki muna fakataugasoa; Kae 'fatu ne latou a vaega tala 'loi katoa e uiga ki tino ola filemu.

²¹Ne 'ti mai ne latou te 'se ki a au, Kae kalaga penei, “Ne matea ne matou au mea ne fai!”

²²Ka ko koe e te Aliki, ko oti ne matea ne koe te mea nei. Sa nofo 'mu, sa nofo 'mao foki mo au!

²³Te Aliki, ala mai o 'pui au; Toku Atua, tu mai ki luga o fakatonu aka toku fakamasinoga.

²⁴Te Aliki, a koe e amiotonu, tela la fakaasi atu i au e se se; Toku Atua, sa tuku mai oku fili ke kata fakatauemu mai ki a au.

²⁵Mo a foki ma fai'pati ake latou pela i a latou eiloa, “Ko takavale a ia i a matou! Tena fua te mea ne manako matou ki ei!”

²⁶Latou foki kola e kata fakatauemu ki toku puapuaga, Ke fakatakavale kae ke 'numi olotou mafaufau; A latou foki kola e fai ake i a latou e sili atu i a au, Ke fakamasiasigina latou.

²⁷Ka ko latou kola e fia matea ne latou au ke sao mai te fakamasinoga Ke ka'laga mo te fiafia kae fai ake faeloa penei, “E sili eiloa te Aliki! Ko fiafia a ia i te manuia o tena tavini.”

²⁸Tela la, ka takutaku atu ne au tou amiotonu, Kae ka viki atu au ki a koe i te ao katoa.