Read Te Tusi Tapu I Te Gana Tuvalu Lomiga Lua SALAMO 36 Bible Online

SALAMO 36 - Te Tusi Tapu I Te Gana Tuvalu Lomiga Lua bible

SALAMO 36

¹[46] A te agasala ko nofo i te loto o te tagata amio masei, Tela ko teke ei a ia ki te Atua, Kae se mataku foki ki a ia.

²Ona ko te mea e isi sena manatu fakamaualuga i a ia eiloa, Ko manatu ei a ia i te Atua e se lavea ne ia ana agasala kae se fakasala foki a ia.

³Ana muna katoa e fonu i te masei mo te loi; Ko se toe fai foki ne ia se mea aoga mo te 'lei.

⁴E mafaufau a ia ki fuafuaga ma'sei i luga i tena moega; E seai se mea e fai ne ia e 'lei, Kae e se teke foki a ia ki se mea masei.

⁵Te Aliki, a tou alofa tumau ko oko atu ki te lagi; A tou fakamaoni foki ko oko atu ki te vanimonimo.

⁶A tou amiotonu e pela mo te atu mauga lasi; Tau faimeatonu foki e pela mo te poko o te moana. A tino mo manu e tausi ne koe.

⁷Te Atua, ko oko eiloa te taua o tou alofa tumau! E maua ne matou[47] te lafiga i lalo ifo o te maluga o ou kapakau.

⁸E 'kai matou i meakai uke ne aumai ne koe; E fainu ne koe matou mai te vaitafe o tou lei katoatoa.

⁹A koe ko te pogai o te ola katoatoa; Ko tou mainaga ko iloa ei ne matou te mainaga.

¹⁰Ke tumau faeloa tou alofa ki a latou kola e iloa ne latou a koe; Kae fai foki a mea 'lei ki a latou kola e amiotonu.

¹¹Sa tuku mai tino fakamaualuga ke mai o ta a au io me ko tino amio ma'sei ke afuli ne latou au keatea.

¹²Kilo atu ki te koga tela ne 'siga ei a tino amio ma'sei. Ko ta'kato faeloa i kona, Ko se mafai o tu ake ki luga.