Read Te Tusi Tapu I Te Gana Tuvalu Lomiga Lua SALAMO 37 Bible Online

SALAMO 37 - Te Tusi Tapu I Te Gana Tuvalu Lomiga Lua bible

SALAMO 37

¹[48] Sa manava'se ki faiga a tino amio ma'sei; Sa loto ma'sei foki ki tino fai mea se tonu;

²Ka galo atu latou e pela mo mouku kola ko pakupaku; Ka 'mate foki latou e pela mo lakau kola ko mage'mage.

³Fakatuanaki ki te Aliki kae fai mea lei; Ke ola lei koutou i te fenua mo te filemu.

⁴'Sala tou manuia ki te Aliki, Kae ka avatu ne ia ki a koe te mea e manako koe ki ei.

⁵Tuku atu katoa a koe ki te Aliki; Fakatuanaki ki a ia, kae ka fesoasoani a ia ki a koe;

⁶Ka fai ne ia tau amio lei ke maina atu e pela mo te mainaga o te la i te tutonu.

⁷Fifilemu kae fakatalitali ki te taimi e fai ei ne te Aliki a te mea e tau o fai; Sa manavase koe ki tino kola e manuia, io me ki tino kola e taunu 'lei a fuafuaga ma'sei a latou.

⁸Sa manavase io me kaitaua; Me e taki fua ne ia koe ki fakalavelave.

⁹A latou kola e fakatuanaki ki te Aliki, Ka fai mo latou te fenua, Ka ko tino amio ma'sei ka afuli keatea.

¹⁰E se toe leva nei, ka galo atu ei a tino amio ma'sei; Ka salasala ne koe latou, kae se maua ne koe;

¹¹ Ka ko latou kola e loto malalo, ka fai mo latou te fenua, Kae ka maua ne latou te manuia mo te filemu katoatoa.

¹²E faitogafiti masei a te tino amio masei ki te tino amio lei, Kae pula 'toka ki ei mo te takalialia.

¹³E kata te Aliki ki tino amio ma'sei, i te mea e iloa ne ia me ko pili fua o malaia.

¹⁴Ko tata ake a pelu a tino amio ma'sei kae futi olotou kausana, O tamate a tino ma'tiva mo tino e fia maua se fesoasoani; O tamate foki a tino amio lei;

¹⁵Kae ka 'mate eiloa latou i olotou pelu, Ka fati'fati foki olotou kausana.

¹⁶A te mea foliki tela e maua ne te tino amio lei, E sili atu te aoga i koloa katoa a te tino amio masei,

¹⁷Me i te Aliki ka ave keatea ne ia te malosi o tino amio ma'sei, Kae puipui ne ia a tino amio lei.

¹⁸E tausi ne te Aliki a latou kola e faka'logo ki a ia, Ka fai foki mō latou te fenua ki te se gata mai.

¹⁹E se fi'ta latou ma oko mai aso o puapuaga; E lava 'lei foki olotou meakai i aso o te oge.

²⁰Ka ko tino amio ma'sei ka 'mate; A fili o te Aliki ka 'galo atu e pela mo pula lakau o te vao; Ka 'galo atu foki latou e pela mo se au o te afi.

²¹E kaitalafu te tino amio masei kae se toe togi, Ka ko te tino amio lei e kaimalie, Kae tuku atu fua ana mea.

²²A tino kola e fakamanuia ne te Aliki, E nofo filemu a latou i te fenua, Ka ko tino kola e fakamalaia ne te Aliki, Ka afuli keatea mai te fenua.

²³E takitaki ne te Aliki a te tino ke sao 'lei i te auala e 'tau o fano a ia i ei; Kae puipui ne ia a latou kola e fakafiafia ki a ia.

²⁴Kafai e 'siga latou, e toe vave 'tu, Me fesoasoani te Aliki ki a latou o toe fakatū ake.

²⁵Au nei ko toeaina, ko leva eiloa toku olaga, Kae seki iloa eiloa ne au se tino amio lei ke tiakina ne te Aliki, io me ko ana tamaliki foki ke akai meakai.

²⁶E kaimalie a ia i aso katoa, kae tuku atu foki ana mea ke kaitalafu ne tino, A tamaliki foki a ia e manuia faeloa.

²⁷Ke fulitua koe mai mea ma'sei kae fai mea lei, Ka ko au fanau ka ola i te fenua ki te se gata mai;

²⁸Me i te Aliki e fiafia ki te mea tonu, E se mafai foki o tuku tiaki ne ia ona tino fakamaoni. E puipui faeloa ne ia a latou, Ka ko fanau a tino amio ma'sei ka afuli ne ia keatea.

²⁹A tino amio'tonu ka fai mo latou te fenua, Kae ka 'nofo faeloa i ei ki te se gata mai.

³⁰A muna a te tino amio lei e fai mo te poto, E amiotonu foki a ia i mea katoa.

³¹E tausi ne ia te tulafono a tena Atua i tena loto, Kae se mafai o tiakina ne ia.

³²E lamalama te tino amio masei ki te tino amio lei o taumafai ke tamate ne ia;

³³Kae se mafai ne te Aliki o toku atu a ia ki te malosi o tena fili, io me tuku atu foki a ia ke sala i te fakamasinoga.

³⁴Ke fakamoemoe koe ki te Aliki kae fakalogo ki ana fakatonuga; Ka fakamanuia ne ia a koe o tuku atu mo koe te fenua, Kae ka lavea foki ne koe a tino amio ma'sei ka afuli keatea.

³⁵Ne iloa ne au se tino amio masei i aso mua tela e pule malosi mo te sauā; E maluga atu a ia i tino katoa e pela me se alasi o Lepanona;

³⁶Kae fakamuli ifo, ne fanatu au ki te koga ne tu i ei, ka ko galo i ei; Ne salasala au ki ei, kae ne seki maua eiloa ne au.

³⁷Onoono faka'lei ki te tino amio lei, Kilokilo faka'lei foki ki te tino amiotonu; A te tino filemu e fanafanau.

³⁸Ka ko tino agasala e malaia eiloa, A fanau foki a latou ka, 'solo keatea.

³⁹E fakaola ne te Aliki a tino amiotonu, Kae puipui foki ne ia latou i taimi o fakalavelave.

⁴⁰E fesoasoani a ia ki a latou kae fakasao foki ne ia latou; E fakaola ne ia a latou mai tino amio masei, Me olo atu a latou ki a ia mō se puipuiga 'lei.