Read Te Tusi Tapu I Te Gana Tuvalu Lomiga Lua SALAMO 39 Bible Online

SALAMO 39 - Te Tusi Tapu I Te Gana Tuvalu Lomiga Lua bible

SALAMO 39

¹[50] Au ne fai ake penei, “Au ka fakaeteete i aku mea e fai, Kae ka se fai foki toku laulaufaiva mo mea e agasala ei au; Ka se faipati foki au ki se mea manafai e pili mai a tino amio ma'sei.”

²Au ne filemu, seki ai loa saku pati ne fai, E se faipati foki eiloa au e uiga ki se mea 'lei! Ka ko oku puapuaga ne gasolo eiloa o ma'sei,

³A toku loto foki ne fonu i te manavase. Ko te taimi e mafaufau malosi ei au, Ko te taimi foki tena e gasolo ei au o maua ne fakalavelave; Ne seki mafai ne au o taofi toku fia fesili penei:

⁴“Te Aliki, e fia tausaga e ola ei au? Afea e mate ei au? Fakailoa mai me oti mafea toku ola.”

⁵Ko oko eiloa i te toetoe o toku ola ne fai ne koe! A te leva o toku olaga e pela fua me se mea e seai i tau kilokiloga. E tonu eiloa i tino ola katoa e pela fua me ne laumatagi,

⁶E pela fua me ne ata. A mea katoa e fai ne ia e seai se aoga; E fakaputu ne ia a koloa, kae se iloa ne ia me ko oi te tino ka puke ma ia.

⁷Tela la, te Aliki, se a te mea e fakamoemoe au ki ei? Au e fakamoemoe eiloa ki a koe.

⁸Fakaola mai au mai aku agasala katoa, Kae ke mo a e 'kata mai a tino va'lea ki a au.

⁹Au ka filemu, ka seai eiloa saku muna e fai, Me ko koe ne fai ne koe au ke puapuaga penei.

¹⁰Sa toe fakasalagina au! Ko tai mate ake eiloa au i au kiniga.

¹¹E fakasala ne koe te tino i ana agasala, i tou kaitaua, Kae e fakamasei ne koe a mea kola e fiafia a ia ki ei, E pela me se mogamoga. E tonu eiloa i te tagata e pela fua me se lau matagi!

¹²Te Aliki, fakalogo mai ki taku 'talo, Kae fakalogo mai foki ki taku fakatagi; Vau o fesoasoani mai ki a au i taimi e tagi ei au. E pela eiloa mo oku tupuna katoa, Au se tino fua ne 'kami ne koe mo se taimi toetoe.

¹³Tuku mai au ke fiafia malie ake, ka koi tuai au o fano keatea ko galo atu ei au.