Read Te Tusi Tapu I Te Gana Tuvalu Lomiga Lua SALAMO 40 Bible Online

SALAMO 40 - Te Tusi Tapu I Te Gana Tuvalu Lomiga Lua bible

SALAMO 40

¹[51] Au ne fakatali mo te loto kufaki ki te fesoasoani mai o te Aliki; Ne fakalogologo mai a ia ki a au, lagona ei ne ia taku tagi.

²Ne avake ne ia au mai lalo i te lua fakamataku, Ne avake foki ne ia a au mai te lua pelapela. Ne fakatu faka'lei ne ia au i luga i te kaupapa, Ko sao 'lei ei au.

³Ne akoako ne ia a au ke usu ne au te pese fou, Se pese tavae ki te tou Atua. E tokouke ka lavea ne latou te mea nei kae ka ma'taku, Ka fakatuanaki ei latou ki te Aliki.

⁴Amutia latou kola e fakatuanaki ki te Aliki, Kola e se fuli atu o ifo ki tupua, io me fakatasi atu foki ki tino kola e tapuaki ki atua loi.

⁵Te Aliki te motou Atua, ko oti ne fai ne koe mea e uke mō matou; E seai se tino e pau mō koe! Ko oti ne fai ne koe a fuafuaga gali mo matou. E se mafai ne au o fakalaulau atu katoa me ko to uke!

⁶ E se manako koe ki ne taulaga; E se manako foki koe ki manu e sunu katoa i luga i te fata-fai-taulaga io me ko taulaga mō te fakamagaloga o agasala. Kae lei me ne tuku mai ne koe ki a au a taliga ke lagona ne au a koe,

⁷Tela ne tali atu ei au penei, “Tenei au; a fakatonuga a koe mō oku kola i te tusi Tulafono.[52]

⁸Toku Atua, e fiafia au o fai tou loto! E tausi ne au, au akoakoga i toku loto.”

⁹Te Aliki, i te maopoopoga o ou tino, Ne taku atu ei ne au te tala 'lei e uiga ki te fakasaoga ne koe matou. E iloa ne koe me ka fakamatala faeloa ne au i taimi katoa.

¹⁰Ne seki funa ne au te tala o te fakaolataga i a au eiloa; Au e masani faeloa o faipati ki tou fakamaoni mo tou fesoasoani. I te fakatasiga o ou tino katoa ne faipati eiloa au e uiga Ki tou fakamaoni mo tou alofa tumau.

¹¹Te Aliki, e iloa ne au me ka se mafai eiloa o gata tou alofa ki a au. A tou alofa mo tou fakamaoni e tausi mai faeloa ke sao 'lei au.

¹²Ko nikoi au ne fakalavelave e uke, E se mafai o lau! Ko maua au ne aku agasala, ko se mafai ei au o matea se mea; Ko uke atu i oku laulu, Ko galo atu foki toku loto toa.

¹³Te Aliki, fakaola mai au! Fesoasoani mai nei ki a au!

¹⁴Ke fakatakavale kae fakanumi a mafaufau o latou kola e taumafai o tamate a au. A latou kola e fiafia i te uke o oku puapuaga, Ke fakagata kae fakamasiasi.

¹⁵A latou foki kola e fakatauemu ki a au, Ke masiasi i te lotou takavale.

¹⁶Ke fia'fia kae 'lifu a latou katoa kola e olo atu ki a koe. A latou katoa kola e fakafetai ki tau fakaolataga, Ka fai'pati faeloa penei, “Ko oko eiloa i te maluga o te Aliki!”

¹⁷Te Aliki, au ko vaivai kae mativa, Kae seki fakapuli eiloa a au ne koe. A koe ko toku fakaola mo toku Atua, Fakavave mai o fesoasoani mai ki a au!