Read Te Tusi Tapu I Te Gana Tuvalu Lomiga Lua SALAMO 41 Bible Online

SALAMO 41 - Te Tusi Tapu I Te Gana Tuvalu Lomiga Lua bible

SALAMO 41

¹[53] Amutia a latou kola e saga ki tino mativa; Me ka fesoasoani ki a latou a te Aliki i taimi e maua ei latou ne puapuaga.

²Ka puipui kae tausi faka'lei ne te Aliki olotou ola; Ka fai ne ia a latou ke fiafia i te fenua; Ka se tiakina ne ia a latou ki te malosi o olotou fili.

³A te Aliki ka fesoasoani ki a latou manafai e ma'saki a latou, Kae toe fakafoki ne ia te malosi ki a latou.

⁴Ne fai ake au penei, “Toku Aliki, au ko oti ne agasala atu ki a koe; Alofa mai ki a au, kae faka'lei ake toku masaki.”

⁵E fai muna ma'sei mai oku fili ki a au. E ma'nako latou ke mate au, kae ke se toe masaua.

⁶A latou kola e o'mai o asiasi mai, E se a'lofa; e fakaputu ne latou a tala ma'sei katoa e uiga ki a au, Ko olo atu ei latou o tala atu i koga katoa.

⁷A tino katoa kola e takalialia ki a au, E fakatau musumusu latou e uiga ki a au, Kae mafau'fau latou ki mea e masei ei au.

⁸Olotou muna, “Ko oko eiloa i te malosi o tena masaki; E se toetu ake eiloa a ia mai tena moega.”

⁹E oko foki eiloa ki toku taugasoa pele, Te tino tela e tafasili toku fakalagolago ki ei, Te tino tela e kai fakatasi sale mo au, ko fai fili ki a au.

¹⁰Te Aliki, alofa mai ki a au, kae toe fakafoki mai toku malosi, Kae ka toe taui atu ne au ki oku fili a mea ne fai ne latou ki a au.

¹¹Ka se manumalo a latou i a au, Ka iloa ei ne au i a koe e fiafia mai ki a au.

¹²Ke fesoasoani mai koe ki a au, Me e fai ne au te mea tonu; Tuku mai au ke nofo i ou mua ki te se gata mai.

¹³Viki atu ki te Aliki, te Atua o Isalaelu! Viki atu ki a ia nei, ke oko atu eiloa ki te se gata mai! Amene! Amene!