Read Te Tusi Tapu I Te Gana Tuvalu Lomiga Lua SALAMO 42 Bible Online

SALAMO 42 - Te Tusi Tapu I Te Gana Tuvalu Lomiga Lua bible

SALAMO 42

¹[54] E pela mo te tia e manako malosi ki se vaipuna 'moko, E pena foki toku manako malosi ki a koe, e te Atua.

²Te Atua ola, ko oko eiloa toku manako ki a koe; Ko afea e mafai ei ne au o fanatu o tapuaki i ou mua?

³Au e tagi faeloa i te ao mo te po, ka ko oku loimata ko aku meakai eiloa kona; i taimi katoa, e fesili mai faeloa oku fili penei: “Tefea tou Atua?”

⁴E fatifati toku loto manafai e masaua ne au a aso ko 'teka, i te taimi ne olo tasi ei matou mo te vaitino ki te fale o te Atua Kae takitaki ne au a latou i te sasalega a latou; Se potopotoga fiafia, e pese kae ka'laga ki vikiga o te Atua.

⁵Ai a e fanoanoa ei au? Ai a e puapuagatia ei au? Ka tuku atu toku fakamoemoega ki te Atua, kae ka toe viki atu foki au ki a ia. Toku fakaola mo toku Atua.

⁶E fatifati toku loto i te koga tenei e fakapagota ei matou, Tela ne fakasaga ei oku mafaufauga ki a ia. Ne fai ne ia au ke fanoanoa; Te masei ko oko mai ki a au e pela mese lofiaga, E pela mo te tafe ki loto i te vai o Iolitana mai te mauga o Helemoni mo te mauga o Misa.

⁸Ke fakaasi ne te Aliki tena alofa tumau i te ao, Ke 'pese au ki vikiga o ia i po katoa, Kae talo ki te Atua, tela e maua ei toku ola.

⁹E faipati atu au kite Atua toku lafiga penei: “Ai a ko tiakina ei ne koe au? Ai a ko puapuagatia Faeloa ei au penei, mai te fakasaua o oku fili?”

¹⁰Au ko logofiofio i olotou muna ma'sei, E fesili mai faeloa penei ki a au, “Tefea tou Atua?”

¹¹Ai a e fanoanoa ei au penei? Ai a e puapuagatia ei au? E fakamoemoe au ki te Atua, ka toe viki atu foki au ki a ia, Ko toku fakaola mo toku Atua.