Read Te Tusi Tapu I Te Gana Tuvalu Lomiga Lua SALAMO 44 Bible Online

SALAMO 44 - Te Tusi Tapu I Te Gana Tuvalu Lomiga Lua bible

SALAMO 44

¹[55] Te Atua, ko oti ne lagona ne matou ki omotou taliga, Ne taku mai ki a matou ne omotou tupuna, E uiga ki galuega lasi ne fai ne koe i olotou taimi, i aso ko leva ne teka atu:

²i te tuliga ne koe keatea a tino mai olotou fenua, Kae faka'nofo i ei ou tino i fenua kona; i te fakasalaga foki ne koe a nisi malo kae fakamanuia ne koe ou tino.

³Ne seki fakatakavale ne ou tino a fenua kona ki olotou pelu; Ne seki manumalo latou i te lotou malosi eiloa, Kae ko tou 'mana mo tou malosi, Mo te fakamaoniga o tou fakatasi mo latou, Ko fakaasi mai ei me ne alofa koe ki a latou.

⁴A koe ko toku tupu mo toku Atua; e tuku atu ne koe te manumalo ki ou tino,

⁵Kae i tou 'mana e fakatakavale ei ne matou omotou fili.

⁶E seki fakalagolago au ki taku kausana, io me ko taku pelu ke sao ei au;

⁷Ka ko oti ne fakasao ne koe matou mai omotou fili, Ko oti foki ne fakatakavale ne koe a latou kola e ita mai ki a matou.

⁸E viki atu faeloa a matou ki a koe, Kae fakafetai atu ki a koe ki te se gata mai.

⁹Kae nei, e te Atua, ko oti ne tiakina ne koe matou, Kae tuku atu matou ke takavale; Ko se toe fakatasi mai koe ki omotou kautau.

¹⁰Ko fai ne koe matou ke 'tele keatea mai omotou fili, Kae ave ne latou omotou mea ma latou.

¹¹Ko tuku atu ne koe a matou ke tamate pela me ne mamoe; Ne fakasalalau foki ne koe matou i fenua fakaatea.

¹²Ne fakatau atu ne koe ou tino ki se 'togi māmā, Me ko se taua latou i ou manatu.

¹³Ka lavea ne omotou tuakoi a mea ne fai ne koe ki a matou, Tela ne fakatauemu kae fakalili mai ei latou ki a matou.

¹⁴Ko fai ne koe matou mo mea fakalumalumagina a fenua; E luelue mai olotou ulu mo te fakalili ki a matou.

¹⁵Au e fonu i te ma mo te masiasi,

¹⁶i te fakalogo atu ki muna fakatauemu mo te fakamasei, Mai oku fili mo tino kola e ita ki a au.

¹⁷Kae ne seki fakapuli eiloa ne matou a koe, io me ofa ne matou te feagaiga ne fai ne matou mo koe.

¹⁸E seki fai pela me ne seki fakamaoni matou ki a koe, E seki fai foki pela me seki faka'logo matou ki au fakatonuga.

¹⁹Ka ko tiakina eiloa ne koe a matou e aunoa mo se fesoasoani i loto i manu fe'kai; Ne tiakina ne koe matou i te pouliga matolu.

²⁰Kafai ne seki tapuaki atu matou ki te motou Atua, Kae ne 'talo atu matou ki se atua fakaatea,

²¹E iloa eiloa ne koe te mea tena, i te mea e iloa ne koe a mafaufauga 'funa o matou.

²²E pogai mai i a koe te tamatega o matou i aso katoa, Ko pela foki matou me ne mamoe ka tamate.

²³Te Aliki, ala mai! Ai a e moe ei koe? Tu mai ki luga! Sa teke mai ki a matou ke oko ki te se gata mai!

²⁴Ai a e muni ei koe i a matou? Mo a ma puli i a koe omotou puapuaga mo omotou fakalavelave!

²⁵Ko 'siga masei matou ki lalo i te laukele; Ko takato matou i te pefu, i a matou ko takavale.

²⁶Tu mai ki luga kae fesoasoani mai! Fakaola mai matou i tou alofa tumau!