Read Te Tusi Tapu I Te Gana Tuvalu Lomiga Lua SALAMO 45 Bible Online

SALAMO 45 - Te Tusi Tapu I Te Gana Tuvalu Lomiga Lua bible

SALAMO 45

¹[56] Ko 'fonu toku mafaufau i muna gali, Ka koi fakatoka ne au te pese tenei mō te tupu. A toku laulaufaiva ko toka mo te pese, E pela me se 'peni a te tino tusilima 'lei.

²A koe ko te tagata e sili i te taulekaleka i tagata katoa; A koe se tagata poto i te faipati. Ne fakamanuia faeloa te Atua ki a koe.

³Te tupu malosi, fakamau faka'lei tau pelu; A koe e 'malu kae maluga.

⁴I tou 'malu, fano mo te manumalo; Puipui te mea tonu mo te fai mea tonu![57] Ko tou malosi ka maua ei ne koe a manumalo lasi!

⁵A matasana a koe e makai'kai, e suki ei a fatu o ou fili; A malo ka siga kae tafola i lalo i ou vae.

⁶A te malo tela ne tuku atu ne te Atua ki a koe, Ka tumau ki te se gata mai, se gata mai eiloa. E pule koe i tou malo mo te fai mea tonu;

⁷E fiafia koe ki te mea tonu, kae takalialia koe i te mea masei. Tena te mea ne filifilia ei koe ne te Atua, Tou Atua, kae silia atu te fiafia ne tuku atu ki a koe i lo tupu katoa.

⁸A ou gatu e fakasausau ki te mulo mo te aloe; A koe e fakafiafia ne tino fai pese i palesi kola e fakagaligali ki nifo o elefane.

⁹E isi ne tamaliki fafine a tupu i te kau tamafine i tou palesi, Ka ko te feitu fakaatamai o tou nofogaaliki e tu ei te kuini, Tela e tau tena foitino ki teuga aulo e sili i te 'gali.

¹⁰Te avaga a te tupu, fakalogo mai ki aku muna, Fakapuli ou tino mo ou kaiga.

¹¹Ko tou tino gali ka manako ei te tupu ki a koe; A ia ko tou pule, e 'tau ei mo koe o fakalogo ki a ia.

¹²Ka aumai ne tino o Tulo ki a koe a meaalofa; A tino mau'mea foki ka taumafai ke fiafia atu koe ki a latou.

¹³A te tamaliki fafine a te tupu e nofo i te palesi, Ko oko eiloa i te tinogali! A tena gatu ne 'sui ki filo aulo.

¹⁴Ko takitaki atu a ia ki te tupu mo ona gatu lanu kesekese, Ka ko ona taugasoa fafine e tau'tali atu i a ia, E olo atu foki latou ki te tupu.

¹⁵E olo atu latou mo te lifu mo te fiafia, Ki loto i te palesi o te tupu.

¹⁶A koe, toku tupu, ka tokouke au tamaliki tagata ke fai mo tupu, E sui ei ou tupuga, ka fai ne koe latou mo pule i te lalolagi katoa.

¹⁷A taku pese tenei ka fakatumau ne ia tou takutakua ki te se gata mai, Ka 'viki atu foki ki a koe tino katoa i aso katoa mai mua nei.