Read Te Tusi Tapu I Te Gana Tuvalu Lomiga Lua SALAMO 46 Bible Online

SALAMO 46 - Te Tusi Tapu I Te Gana Tuvalu Lomiga Lua bible

SALAMO 46

¹[58] A te Atua ko te lafiga mo te malosi o tatou, E toka faeloa a ia o fesoasoani ki a tatou i taimi o puapuaga.

²Tela la, e se tau mo tatou o ma'taku, Manafai e galulu te lalolagi, kae 'siga atu foki a mauga ki koga 'poko o te moana;

³Manafai foki e sou te tai mo te fakamataku, Mo te gasue'sue foki o mauga i te malosi fakamataku.

⁴E isi se vaitafe e aumai ne ia te fiafia ki te fa'kai Mo te faletapu o te Atua Sili i te Maluga.

⁵A te Atua e nofo i te fa'kai tena, Kae ka se mafai eiloa o fakamaseigina; Ka vau a ia o fesoasoani ki ei i te tafataeao 'malu eiloa.

⁶Ko ma'taku a fenua, mo malo foki ko pole'pole; E kalaga mai te Atua, te lalolagi eiloa ko liu vai.

⁷A te Aliki Tafasili i te Malosi e fakatasi mo tatou; A te Atua o Iakopo ko te tou lafiga.

⁸O'mai o 'kilo ki mea ne fai ne te Aliki. 'Kilo ki mea fakaofoofogia ne fai ne ia i te lalolagi.

⁹E fakagata ne ia a taua i te lalolagi katoa; E fatifati ne ia a kausana, e fakamasei ne ia a tao, Kae 'sunu ne ia a talita ki te afi.

¹⁰Ana muna, “Fakagata te otou faitaua, kae ke iloa ne koutou me i au ko te Atua, E sili i fenua katoa, e sili foki i te lalolagi.”

¹¹A te Aliki Tafasili i te Malosi e fakatasi mo tatou; A te Atua o Iakopo ko te tou lafiga.