Read Te Tusi Tapu I Te Gana Tuvalu Lomiga Lua SALAMO 48 Bible Online

SALAMO 48 - Te Tusi Tapu I Te Gana Tuvalu Lomiga Lua bible

SALAMO 48

¹[61] A te Aliki e sili, kae 'tau o ma'luga ona vikiga i te fa'kai o te tou Atua, i luga i tena mauga tapu.

²A Siona tela ko te mauga o te Atua, e maluga kae gali; A te fa'kai o te tupu sili e aumai ne ia te fiafia ki te lalolagi katoa.

³Ko oti ne fakaasi mai ne te Atua me e 'malu tatou i a ia i loto i 'pui o te fa'kai.

⁴Ne luku fakatasi a tupu, kae o'mai o fai taua ki te Mauga o Siona.

⁵Ne ofo valevale latou i te laveaga ne latou a Siona; Ne ma'taku kae 'tele keatea.

⁶I kona, ne ma'taku ei latou kae fi'ta, E pela me se fafine ka fai o fanau se tamaliki,

⁷E pela me ne vaka ko i loto i se afā fakamataku.

⁸Ko oti ne lagona ne tatou mea ne fai ne te Atua, Kae nei ko matea ne tatou i te fa'kai o te tou Atua, Te Aliki Sili i te Malosi; Ka tausi ne ia te fa'kai ke sao 'lei ki te se gata mai.

⁹Te Atua, i loto i tou Faletapu e mafaufau ei matou ki tou alofa tumau.

¹⁰E vikia koe ne tino i koga valevale, Ka ko tou takutakua foki e oko atu ki te lalolagi katoa. E pule koe mo te amiotonu;

¹¹Ke fia'fia a tino o Siona! E fai ne koe a fakamasinoga tonu; Ke nofo te fiafia i fa'kai o Iuta!

¹²Tino o te Atua, sasale i feitu katoa o te Mauga o Siona, Kae lau ona taoa;

¹³Ke iloa 'lei ne koutou ona 'pui, kae sukesuke foki ki ona olo, Ke mafai ne koutou o taku atu ki te sua kautupu penei:

¹⁴“Te Atua tenei ko te tou Atua ki te se gata mai, se gata mai eiloa; Ka takitaki ne ia a tatou i taimi katoa fakamuli.”