Read Te Tusi Tapu I Te Gana Tuvalu Lomiga Lua SALAMO 49 Bible Online

SALAMO 49 - Te Tusi Tapu I Te Gana Tuvalu Lomiga Lua bible

SALAMO 49

¹[62] Tino katoa, faka'logo mai! Tino katoa i koga valevale, Faka'logo mai,

²Tino ma'luga mo tino ma'lalo, tino maumea mo tino ma'tiva.

³A oku mafaufauga e 'loto; ka faipati foki au ki muna o te poto.

⁴Ka mafaufau malosi au ki muna fakatusa, Kae fakamatala olotou uiga i te taimi e tātā ei au i te kitala.

⁵Au e se mataku i taimi o puapuaga, Mafai e nikoi au ne oku fili,

⁶Ne tino ma'sei kola e fakalagolago ki te lotou maumea, Kae e fakamata'mata foki i te lasi o te olotou maumea.

⁷E se mafai lele eiloa ne te tagata o fakaola a ia, E se mafai foki ne ia o togi atu ki te Atua te togi o tena ola,

⁸Me i te togi o te ola o te tino ko to lasi. A te mea e mafai ne ia o 'togi e se taitai eiloa o lava,

⁹Mo ona sao mai te tanuga, Mo ona ola foki ki te se gata mai.

¹⁰E iloa ne so se tino me i tino poto e mate foki E pela eiloa mo tino va'lea mo tino fakasupasupa. E tuku katoa ne latou olotou koloa ki olotou fanau.

¹¹A tanuga o latou, ko olotou fale kona ki te se gata mai; E nofo latou i kona i taimi katoa, Kae tela la, ne isi eiloa ne olotou manafa totino i aso ne ola ei latou.

¹²E se mafai ne te malosi o te tagata o fakasao a ia mai te mate; Ka mate eiloa a ia e pela mo manu.

¹³Kilo mai ki te mea e tupu ki a latou kola e fakalagolago ki a latou eiloa, 'Kilo mai ki te ikuga o latou kola ko lotoma'lie i te lotou maumea,

¹⁴Ko oti ne fakamalaia a latou ke 'mate e pela mo mamoe, Kae ka fai te Mate mo tausi mamoe o latou. Ka manumalo a tino amiotonu i a latou, Me ka vave 'pala olotou foitino i te fenua o tino 'mate, E 'mao mai i olotou kaiga!

¹⁵Ka ko te Atua ka fakasao ne ia a au; Ka fakasao ne ia a au mai te malosi o te mate.

¹⁶Sa ita manafai e maukoloa se tino, Ma fai foki e gasolo ake loa o uke ana koloa;

¹⁷Me e se mafai ne ia o fano mo ana koloa ma fai e mate a ia, E se tau'tali atu i a ia ana koloa ki lalo i te tanuga.

¹⁸E ui eiloa e lotomalie se tino i te olaga tenei Kae vikia foki a ia i tena manuia,

¹⁹E kau fakatasi atu eiloa a ia ki ona tupuna i te taimi e mate ei a ia i te koga tela e tumau faeloa i ei te pouliga ki te se gata mai.

²⁰E se mafai ne te malosi o te tagata o fakasao a ia mai te mate; E mate eiloa a ia e pela mo manu.