Read Te Tusi Tapu I Te Gana Tuvalu Lomiga Lua SALAMO 52 Bible Online

SALAMO 52 - Te Tusi Tapu I Te Gana Tuvalu Lomiga Lua bible

SALAMO 52

¹[67] Te tagata mafi, se a te mea e fakamatamata ei koe ki au amioga ma'sei? A te alofa o te Atua e tumau ki te se gata mai.

²E fai au aofaga o fakamasei nisi tino; A tou laulaufaiva e pela mo se mata'vele 'kai. E faipati faeloa koe ki te loi.

³E sili atu tou fiafia ki te masei i lo te lei, E sili atu foki tou fiafia ki te mea 'se i lo te mea tonu.

⁴A koe te tino loi, e fiafia koe o fakaitaita a tino ki au muna!

⁵Tela la, ka fakamasei koe ne te Atua ki te se gata mai; Ka puke atu a ia ki a koe o ave keatea mai tou fenua; Ka ave ne ia koe keatea mai te fenua o tino ola.

⁶Ka lavea ne tino amio'tonu te mea tena kae ka ma'taku; Kae ka kata foki latou ki a koe, kae fai ake penei,

⁷“Kiloke, tenei te tagata tela e se fakalagolago ki te Atua ke sao ei a ia, Kae fakalagolago faeloa a ia ki tena maukoloa lasi, Kae salasala foki se koga e sao ei a ia i te faiga o amioga ma'sei.”

⁸Ka ko au e pela me se lakau ko te olive e ola i te fale o te Atua; E fakatuaga au ki tena alofa tumau ki te se gata mai, se gata mai eiloa.

⁹Te Atua, e fakafetai faeloa au ki a koe i mea ne fai ne koe; i te fakapotopotoga o ou tino, Ka folafola atu ne au i a koe e 'lei.