Read Te Tusi Tapu I Te Gana Tuvalu Lomiga Lua SALAMO 53 Bible Online

SALAMO 53 - Te Tusi Tapu I Te Gana Tuvalu Lomiga Lua bible

SALAMO 53

¹[68] E fai ake pela a tino valea ki olotou loto, “E seai se Atua.” A latou ne tino ma'sei katoa, Ko mea ma'sei faeloa ne fai ne latou; E seai se tino o latou e amio 'lei.

²E onoono mai te Atua mai te lagi ki tino i lalo nei, Ke matea ne ia me isi ne tino poto io me isi foki ne tino e tapuaki ki a ia.

³Ka ko fuli keatea katoa a latou mai i a ia, E pau katoa latou i te ma'sei. E seai se tino o latou e amiotonu, e seai lele eiloa se tino e tokotasi.

⁴Muna a te Atua, “E a, e se iloa ne latou? A tino amio ma'sei katoa konei e valea? E ola faeloa latou o 'fao a mea a oku tino, Kae se fakatagi mai latou ki a au.”

⁵Tena, ka ma'taku malosi ei latou i te ma'taku tela e seki maua eiloa ne latou muamua; Me ka fakasalalau ne te Atua a ivi o fili o tena fenua. Ka fakatakavale masei ne Isalaelu a latou, i te Atua ko se fiafia ki a latou.

⁶Au e talo ke oko mai te manumalo ki Isalaelu mai Siona! Ka fia'fia malosi a tino o Isalaelu, Manafai e toe fakamanuia a latou ne te Atua!