Read Te Tusi Tapu I Te Gana Tuvalu Lomiga Lua SALAMO 59 Bible Online

SALAMO 59 - Te Tusi Tapu I Te Gana Tuvalu Lomiga Lua bible

SALAMO 59

¹[74] Toku Atua, fakasao au mai oku fili, Puipui au mai i a latou kola e faitaua mai ki a au!

²Fakasao au mai tino amio ma'sei kona; Fakaola au mai lima o tino tatino!

³Kae kiloke, a latou e fakatalitali o ta au; A tagata saua ko 'luku fakatasi o faitaua mai ki a au. E se pogai mai saku agasala io me saku mea 'se ne fai,

⁴io me se mea ko tosala ei au, Tela ko ala ei o fakavavave latou ki olotou koga nofo.

⁵Te Aliki te Atua Tafasili i te Malosi, tu ake, Vau o fesoasoani mai ki a au; Kilo ou mata ki ei te Atua o Isalaelu! Ala mai o fakasala a fenua fakaatea; Fakaasi atu tou se alofa ki tino faitogafiti ma'sei!

⁶E 'foki mai latou i te afiafi, e fakatau'tagi latou e Pela mo kuli e tele sale i te fa'kai.

⁷Fakalogo ake ki olotou muna fakaitaita mo te fakamasei. A olotou laulaufaiva e pela eiloa me ne pelu i olotou gutu, Kae e mafaufau latou pela me seai se tino e lagona ne ia latou.

⁸Ka ko koe e te Aliki e katakata ki a latou; E fakatauemu koe ki fenua fakaatea.

⁹Au e talitonu ki tou malosi; Te Atua a koe ko toku lafiga.

¹⁰A toku Atua e alofa ki a au, Ka vau o fesoasoani ki a au; Ka fakaasi mai ne ia ki a au te takavale a oku fili.

¹¹Te Atua, sa tamategina latou, i te mea ma puli i toku fenua a akoakoga. Te Aliki te motou puipuiga, Fakasalalau atu latou ne tou malosi kae fakatakavale foki latou.

¹²A te agasala e i olotou laugatu; A olotou muna katoa e fonu i te agasala; Ke malaia eiloa latou i te lotou fia sili!

¹³'Ta fakapalele atu a latou i tou kaitaua; Fakamasei atu a latou me i a latou e muna 'tuku kae 'loi. Ko iloa ei ne tino katoa i te Atua e pule ne ia Isalaelu, Ko tena pule e oko atu ki te lalolagi katoa.

¹⁴E 'foki mai oku fili i te afiafi, e 'tagi e pela me ne kuli e tele sale i te fa'kai,

¹⁵O salasala meakai; kae fakatau'tagi manafai e se makona latou.

¹⁶Ka ko au e viki atu ki tou malosi; i taeao takitasi au e pese fiafia ki tou alofa tumau. I a koe ko oti ne fai mo oku lafiga, ko toku malūga foki i aso o puapuaga.

¹⁷Ka tavae ne au koe, toku puluga, a toku lafiga ko te Atua, Ko te Atua tela e alofa mai ki a au.