Read Te Tusi Tapu I Te Gana Tuvalu Lomiga Lua SALAMO 66 Bible Online

SALAMO 66 - Te Tusi Tapu I Te Gana Tuvalu Lomiga Lua bible

SALAMO 66

¹[82] Ke ka'laga mo te fiafia tino katoa ki te Atua!

²Ke usu pese atu koutou ki te 'malu o tena igoa; Tuku atu ki a ia te vikiga!

³Fai atu koutou penei ki te Atua, “Ko oko eiloa i te fakaofoofogia o au galuega ne fai! Ko te malosi o tou 'mana ko ifo ei ou fili i ou mua i te ma'taku.

⁴E tapuaki atu ki a koe a tino katoa i te lalolagi; E usu pese tavae ki a koe, E usu pese tavae ki tou igoa.”

⁵O'mai o onoono ki mea ne fai ne te Atua, Ko ana galuega fakaofoofogina ki tino.

⁶ Ne fai ne ia te tai ke 'masa; Ne sasale i ei 'tou tupuga ki te sua feitu; i kona ne fia'fia ei tatou i ana mea ne fai.

⁷Ko tena malosi eiloa e pule ei a ia ki te se gata mai, Kae tausi faka'lei ne ia a malo ke seai se tino e tu mai o 'teke ki a ia!

⁸Koutou malo katoa, tavae atu ki te tou Atua; Ke lagona ona tavaega mai i a koutou.

⁹Ne tausi ne ia tatou ke ola kae ne seki tiaki ne ia tatou ke pakū.

¹⁰Te Atua, ko oti ne tofotofo ne koe matou; Ne tofotofo ne koe matou, e pela mo te siliva e faka'ma ki te afi.

¹¹Ne tuku atu ne koe matou ke 'to ki loto i te malei, Ne fakaeke foki ne koe amoga 'mafa ki omotou tua.

¹²Ne tuku mai ne koe omotou fili ke lakalaka matou; Ne sasale matou i loto i te afi mo te vai, kae nei, Ko aumai ne koe matou ki te koga e malu 'lei ei matou.

¹³E avatu ne au a taulaga 'sunu ki tou fale; E avatu ne au ki a koe a mea ne tauto atu ei au.

¹⁴Ka avatu ne au ki a koe a mea kola ne faipati au ki ei, i te taimi e puapuagatia ei au.

¹⁵Ka ofo atu ne au a mamoe ke 'sunu i luga o te fata-fai-taulaga; Ka ofo atu ne au a pulumakau ta'gata mo kouti ke fai mo taulaga, Ka ko te manogi ka oko atu ki luga i te vanimonimo.

¹⁶O'mai o fakalogo'logo, a koutou katoa kola e ava ki te Atua, Me ka taku atu ne au ki a koutou a mea ko oti ne fai ne ia mo oku.

¹⁷Ne fakatagi atu au ki a ia mō se fesoasoani; Ne tavae atu au ki a ia i pese.

¹⁸Moi se taku tonu ne au aku agasala, Penei e se saga mai te Aliki ki a au.

¹⁹Ka ko te Atua ne saga tonu mai eiloa ki a au; Ne fakalogo mai eiloa ki taku 'talo.

²⁰Au e 'viki fakafetai ki te Atua me ne seki fakaseaoga ne ia taku 'talo, Ne seki 'fuli foki eiloa tena alofa tumau mai i a au.