Read Te Tusi Tapu I Te Gana Tuvalu Lomiga Lua SALAMO 68 Bible Online

SALAMO 68 - Te Tusi Tapu I Te Gana Tuvalu Lomiga Lua bible

SALAMO 68

¹[84] Ko tu ake te Atua o atuli ona fili ke 'tele valevale! Ko latou kola e ita ki a ia ko 'tele keatea mo te takavale!

²E pela mo te au ko agina keatea, e pena foki o afuli ne ia latou keatea; E pela mo te sinu 'poto e liusuavai i te afi, Ke pena foki te malaia o tino amio ma'sei i mua o te Atua.

³Ka ko tino amiotonu ka 'lifu kae fiafia i ona mua; E lifu kae ka'laga fiafia.

⁴Ke pese atu koutou ki te Atua i vikiga o tena igoa; Fakatoka se ala mō ia tela e sopo i luga o kaumana. Ko te Aliki tena igoa, ke fia'fia koutou i ona mua!

⁵A te Atua tela e nofo i tena Faletapu 'malu, E tausi ne ia tamaliki ko seai ne matua, E puipui ne ia fafine ko 'mate olotou avaga.

⁶E avatu ne ia ki tino fakaalofa ne fale mo olotou 'nofo, E 'tala ne ia pagota ki te olaga fiafia mo te saoloto; Ka ko latou kola e fakatupu fakalavelave e 'nofo eiloa i te fenua nofogatā.

⁷Te Atua, i te taimi ne takitaki ei ne koe tou fenua, Kae olo tasi foki koutou i te toafa,

⁸ A te lalolagi ne galulu, ne 'to ifo a vaiua mai te lagi, i te fanaifoga o te Atua o Sinai,[85] ko te Atua o Isalaelu.

⁹Ne faka'to ifo ne koe a vaiua, Ko toe ola ake ei lakau o te laukele;

¹⁰Ne 'nofo i kona tou fenua; Ko tou alofa ne fakatoka ei ne koe te koga tena mo tino puapuagatia.

¹¹Ne tuku mai ne te Aliki te fakatonuga, Kae fakasalalau ne fafine te tala tena:

¹²“A tupu mo olotou kautau ko 'tele keatea!” Ka ko fafine ne 'toe i fale ne tufatufa ne latou a koloa o te taua:

¹³E foliga e pela mo lupe ko teu fakagaligali ki siliva, Olotou kapakau e malapulapu e pela mo ne aulo. Kae ai a ne 'nofo ei nisi tino o koutou i olotou lulu mamoe i te aso o te taua?

¹⁴I te taimi ne afuli ei ne te Atua Tafasili i te Malosi a tupu i te Mauga o Salemona, Ne faka'to ifo ei ne ia ki ei te kiona.

¹⁵Ko foki la te malosi o te atu mauga o Pasana; Se mauga e uke ona ulu!

¹⁶A koutou ulu o mauga, ai a e kilo fakatauemu mai ei Koutou ki te mauga ko oti ne filifili ne te Atua mo ona nofo? A te Aliki ka nofo mau eiloa i kona ki te se gata mai!

¹⁷E o'mai fakatasi te Aliki mo ana kaliota ma'losi e afe mo afe, Mai Sinai ki loto i te koga tapu.

¹⁸ Ne fanake a ia ki te koga maluga, E tokouke pagota o te taua ne ave ne ia; Ne maua ne ia meaalofa mai tino faka'tupu fakalavelave. A te Aliki te Atua ka nofo eiloa i kona.

¹⁹Fakafetai atu ki te Aliki, tela e amo ne ia 'tou amoga i aso takitasi; Ko ia foki te Atua e fakaola ne ia tatou.

²⁰A te tou Atua, ko te Atua e fakaola ne ia tatou; A ia ko te Aliki te tou Aliki e fakasao ne ia tatou mai te mate.

²¹Se mea tonu eiloa i te Atua e 'fati ne ia ulu o ona fili, Ko latou kola koi taofi mau ki te faiga o agasala.

²²Muna a te Aliki: “Ka fakafoki mai ne au otou fili mai Pasana; Ka fakafoki mai ne au latou mai te moana 'poko,

²³Ko te mea ke sasale koutou i olotou toto, Mo otou kuli foki ke inu eiloa ki te mea e mafai ne latou.”

²⁴Te Atua, e matea ne tino katoa a te solo manumalo a koe, Ki loto i tou faletapu.

²⁵E muamua te kau usu pese, Kae fakamuli atu te kau ta lakau fakatagitagi, Kae i te kogaloto ko tamafine ta samupelini.

²⁶“Viki atu ki te Atua i te maopoopoga a ona tino; Viki atu ki te Aliki, koutou katoa te fanauga a Isalaelu!”

²⁷E muamua mai te matakaiga o Peniamina te toekimuli, Tafa atu ki ei ko takitaki o Iuta mo olotou potu kau, Mai tua ko takitaki o Sepulona mo Nafatali.

²⁸Te Atua, fakaasi tou 'mana, te 'mana tela ne fakaaoga ne koe mo matou,

²⁹Mai tou Faletapu i Ielusalema e fai meaalofa atu ei a tupu ki a koe.

³⁰Fakasala 'mafa atu Aikupito, ko te manu fekai tela e nofo i te vao mouku 'loa; ita atu ki nisi malo, kola ko lafu pulumakau ma'losi mo olotou tama, Ke oko ki te taimi e ifo atu ei latou kae ofo atu olotou siliva ki a koe. Fakasalalau ne koe a latou kola e fia'fia o fai taua! [86]

³¹Ka o'mai a sui faka te malo mai Aikupito; A tino Aitiope e sisi olotou lima o fai talosaga ki te Atua.

³²Usu pese atu ki te Atua koutou malo o te lalolagi, Pese tavae ki te Aliki,

³³Ki a ia tela e nofo i te lagi, ko te lagi mai mua eiloa. Faka'logo ki a ia tela e pakalaga mo te leo pagulu.

³⁴Folafola atu te 'mana o te Atua; a tena 'malu fakatupu e i luga o Isalaelu, A tena malosi e i luga i te lagi.

³⁵E fakamataku te Atua mafai e vau i loto i tena faletapu, Ko te Atua o Isalaelu! E avatu ne ia te malosi mo te mana ki ona tino. Ke vikia te Atua!