Read Te Tusi Tapu I Te Gana Tuvalu Lomiga Lua SALAMO 69 Bible Online

SALAMO 69 - Te Tusi Tapu I Te Gana Tuvalu Lomiga Lua bible

SALAMO 69

¹[87] Te Atua, fakasao mai au! I a au ko tai malemu i te vai;

²Au ka galo ki lalo i te pela 'poko, Me ko se 'tale oku vae; Au ko to atu ki te koga poko, ko tai malemu au i galu.

³Au ko vaivai i te kalaga atu mō se fesoasoani, Ko fa foki toku leo. A oku mata ko 'mae i te kilokilo atu ki se fesoasoani mai i a koe.

⁴ A latou kola e takalia'lia mai fua ki a au e uke atu i laulu o toku ulu; A oku fili e fai ne latou a pati 'loi o fakamasei au; E malosi latou kae ma'nako o tamate a au. Ne taumafai latou ke tuku atu ne au a mea e seki kaisoa ne au.

⁵Te Atua, e se galo aku agasala i tau kilokiloga; E iloa lei ne koe toku valea i aso ko teka.

⁶Te Aliki te Atua e o koe te Malosi Katoatoa, Ke mo a ma fakamasiasi ne au a latou kola e fakatuanaki ki a koe! Te Atua o Isalaelu, ke mo a ma fakamasiasi ne au a latou kola e tapuaki ki a koe!

⁷Ko fakalumalumagina au ona ko koe; Ko maua foki au ne te masiasi e pogai mai i a koe.

⁸Ko fai au e pela me se tino fakaalofa i oku taina, E pela foki me se tino fakaatea i toku kaiga.

⁹ A toku fia tapuaki i tou Faletapu ko 'ka i toku loto e pela mo se afi; A muna masei kola ne fai atu ki a koe, Ko pakū ki luga i a au.

¹⁰Au e fakamalalo atu i te fakalikiliki, Ko muna maseigina ei au ne tino;

¹¹Ne pei au ki gatu o te fanoanoa, Kae ne fakatauemu mai latou ki a au.

¹²Ko faipatigina au ne latou i auala, Kae fatu foki a pese a tino ko'na e uiga ki a au.

¹³Ka ko au e te Aliki, au e 'talo atu ki a koe; Te Atua, tali mai ki a au i te taimi ne filifili ne koe. Tali mai e pela mo te lasi otou alofa, E pela foki mo tau folafolaga me fakaola ne koe au.

¹⁴Fakasao mai au, i a au ka galo ki lalo i te pela; Fakasao mai foki au mai oku fili, Pela foki mo te vai 'poko.

¹⁵Sa fakaoko mai ki a au a te lofiaga; Sa tuku atu au ke malemu i te koga 'poko, io me to ki lalo i te tanuga.

¹⁶Te Aliki, tali mai ki a au i te 'lei o tou alofa tumau; Saga mai ki a au i te lasi o tou loto alofa!

¹⁷Sa kalo keatea ou mata mai tau tavini; Au ko i loto i te puapuaga lasi, Na tali mai nei ki a au!

¹⁸Vau o fakaola au, fakasao au mai oku fili.

¹⁹Ko iloa ne koe i a au ne muna maseigina, Ne fakalumalumagina kae fakamasiasi; Ko matea katoa ne koe oku fili.

²⁰Ko fatifati toku loto i muna ma'sei, Au ne fakamoemoe ki se tino ke alofa mai ki a au, kae seai eiloa; Ne 'sala foki ne au se tino e fakamafanafana mai ki toku loto, kae seai eiloa.

²¹ Au ne fia kai, kae ne aumai ne latou te mea poisini ke kai ei au; Au ne fia inu, kae ne aumai ne latou te vinika ke inu ei au.

²² Ke fai olotou 'kaiga mo mea e malaia ei latou; Olotou 'kaiga fakatapuakiga foki ke fai mo mea e pakū ei latou.

²³Faka'kivi ake olotou mata! A olotou tua foki ke vaivai!

²⁴Ita atu ki a latou; kaitaua atu foki ki a latou.

²⁵ Ke fakalavaki aka a koga e nofo ei latou; Ke mo a e isi ne tino ola e 'toe i olotou faleie!

²⁶E fakasaua ne latou a tino kola ko oti ne fakasala ne koe; E fai'pati latou e uiga ki puapuaga o tino kola ne fakapa'kia ne koe.

²⁷Fakamau ake olotou agasala katoa; Ke mo a ma maua ne latou se vaega o tau fakaolataga.

²⁸ Ke 'solo keatea olotou igoa mai te tusi o te ola; Ke se fakaopoopo atu foki latou ki te fakasologa o ou tino.

²⁹Au ko mativa kae fita; te Atua, Puke ake au o fakaola!

³⁰Au e 'viki ki te Atua i pese; E folafola atu foki ne au tena 'malu i te tuku atu o fakafetai ki a ia.

³¹E sili atu te fiafia ki ei o te Aliki, i lo te ofo atu o taulaga ki a ia ki pulumakau, E sili atu eiloa i lo te avatu ki a ia se pulumakau tagata ko matua 'lei.

³²Kafai e iloa ne tino ma'tiva te mea tena, Ka fia'fia latou; A latou foki kola e tapuaki ki te Atua ka fakamalosigina.

³³A te Aliki e saga mai ki tino ma'tiva, E se puli foki i a ia ona tino i te falepuipui.

³⁴Tavae ki te Atua te lagi mo te lalolagi, Te tai mo mea katoa kola e ola i ei.

³⁵Ka fakaola ne ia Ielusalema Kae toe faite ne ia fa'kai o luta. Ka 'nofo i kona ona tino, kae fai foki mō latou te fenua;

³⁶Ka fai foki mo tofi o fanau a ana tavini; E 'nofo ei foki a latou kola e alofa ki a ia.