Read Te Tusi Tapu I Te Gana Tuvalu Lomiga Lua SALAMO 71 Bible Online

SALAMO 71 - Te Tusi Tapu I Te Gana Tuvalu Lomiga Lua bible

SALAMO 71

¹Te Aliki, au e vau ki a koe mō se puipuiga; Sa fakatakavalegina au!

²Me i a koe e amiotonu, fesoasoani mai kae fakaola au. Saga mai kae fakasao mai au!

³Ke fai koe mo lafiga[89] e malu 'lei ei au, Mo te olo malosi e puipui ei au; Ko koe eiloa ko toku lafiga mo toku tausi.

⁴Toku Atua, fakasao au mai lima o tino amio ma'sei, Mai te malosi o tino sāuā mo te amio se 'lei.

⁵Te Aliki, ko koe fua toku fakamoemoega, Au ne fakatuanaki eiloa ki a koe mai taku folikiga.

⁶Au ne fakalagolago eiloa ki a koe i toku olaga katoa; Ne puipui au ne koe talu taku fanau maiga. Au ka viki faeloa ki a koe.

⁷A toku ola ko fai pela me se fakaakoakoga ki tino tokouke, Me i a koe ko toku 'puluga malosi.

⁸Au e tavae ki a koe i aso katoa, Kae folafola atu foki ne au a tou 'malu.

⁹Nei, ke se tiakina au ne koe i a au ko toeaina; Sa tiakigina au manafai au ko vaivai.

¹⁰Ko ma'nako oku fili o tamate au; Ko pulepule fakatasi latou o teke mai ki a au.

¹¹Ko fai ake a latou penei, “Ko tiakina a ia ne te Atua; Tatou ka olo o puke a ia me ko seai se tino e fakasao ne ia a ia.”

¹²Te Atua, sa faka'mao mai i a au; Toku Atua, vave mai o fesoasoani mai ki a au!

¹³A latou kola e o'mai o ta au, ke fakatakavale kae 'ta fakapalele. Ke fakamasiasi kae fakamavale a latou kola e taumafai o fakapakia a au.

¹⁴Au e fakamoemoe faeloa ki a koe; Kae ka 'viki atu faeloa ki a koe.

¹⁵E taku atu ne au tou aga 'lei; E faipati foki au ki tau fakaolataga i te aso katoa, E ui eiloa e se oko toku malamalama ki ei.

¹⁶Te Aliki Maluga, ka tavae atu au ki tou malosi; Ka folafola atu ne au tou aga'lei.

¹⁷Te Atua, ko oti ne akoako ne koe au ka koi tamaliki, Ke oko mai ki aso nei koi fakaasi atu eiloa ne au, au galuega fakaofoofogia.

¹⁸Te Atua, au nei ko matua, mo toku ulu foki ko sinā, Sa tiakina mai au! Fakatasi mai koe ki a au i taimi e folafola atu ei ne au Tou mana mo tou malosi ki tupulaga katoa fakamuli.

¹⁹Te Atua, a tau amiotonu ko oko atu ki te lagi. Ko oti ne fai ne koe mea fakaofoofogina; E seai se tino e pau mo koe.

²⁰Ko oti ne aumai ne koe a puapuaga mo mea faiga'ta ki a au, Kae ne toe fakafoki mai ne koe toku malosi; Ne toe avake ne koe au mai lalo i te tanuga.

²¹Ka ko fai ne koe au ke tai maluga atu i lo toku olaga mua; Ka toe fakamafanafana mai au ne koe.

²²Ka viki atu au ki a koe i te kitala; Toku Atua, ko tou fakamaoni eiloa e viki atu ei au. E ta ne au a pese ki taku kitala ki a koe, Te Tasi Tapu o Isalaelu.

²³Au e kalaga fiafia manafai e usu pese atu au ki a koe, i toku agaga katoa e usu pese atu ei au, Me ko oti ne fakasao ne koe au.

²⁴E faipati ne au tau amiotonu i aso katoa, Me i a latou kola ne taumafai o fakapuapuagatia au, Ko oti ne fakatakavale kae fakamasiasi ne koe.