Read Te Tusi Tapu I Te Gana Tuvalu Lomiga Lua SALAMO 73 Bible Online

SALAMO 73 - Te Tusi Tapu I Te Gana Tuvalu Lomiga Lua bible

SALAMO 73

¹[93] E alofa eiloa te Atua ki tagata Isalaelu kola e 'ma olotou loto.

²Toku fakatuanaki toe itiiti eiloa ko seai; A toku talitonu foki ko tai galo atu eiloa.

³Ia au ne loto masei ki tino fia'sili i te mateaga ne au te solosolo 'lei o tino amio ma'sei.

⁴Seai ne mea mae e oko ki olotou foitino; E ola 'lei olotou foitino, kae ma'losi foki.

⁵E se puapuagatia latou pela mo nisi tino; Kae se maua foki ne latou ne fakalavelave kola e maua ne nisi tino.

⁶Tena te mea e safe ei ne latou ki olotou ua te fakamaualuga pela me se malele, Kae fai foki ne latou a te fakasaua mo fai olotou gatu;

⁷E maua mai i olotou loto te amio masei,[94] Mo olotou mafaufau foki e fonu i togafiti ma'sei.

⁸E 'kata fakatauemu latou ki nisi, Kae faipati foki ki mea ma'sei; E fakamatamata latou kae faipati ki mea e fakasaua ei ne latou a nisi tino.

⁹Ne fai ne latou a muna ma'sei ki te Atua i te lagi, Kae fai fakatonuga fiasili ki tino o te lalolagi.

¹⁰Tena te mea ne fuli atu ei a tino o te Atua ki a latou, Kae talitonu ma'losi ki olotou muna katoa.[95]

¹¹E pela olotou muna, “E se iloa ne te Atua; E se mafai foki o iloa ne ia tela e Tafasili i te Maluga.”

¹²E pena eiloa a tino amio ma'sei. E uke olotou mea kae atea e fakaopoopo mai foki nisi mea.

¹³E a, e se aoga a te tausi o toku olaga ke 'ma, mai te agasala?

¹⁴Te Atua, ko oti ne fakapuapuagatia au ne koe i aso katoa; Ko oti foki ne fakasala ne koe au i taeao katoa.

¹⁵Kafai ne faipati atu ne au ne muna pena, E penei ko se tau au o taku me se tino o tou fenua.

¹⁶Tela la, ne taumafai malosi au ke malamalama i te mea tenei, Ka ko oko eiloa te faigata ki a au.

¹⁷Ne fatoa malamalama au i te mea ka tupu ki tino amio ma'sei, i taku fanoga ki loto i tou Faletapu.

¹⁸Ka faka'tu ne koe latou i koga molemole, Ko te mea ke siga latou ki te malaia!

¹⁹Ko vave 'mate latou; kae olo ifo latou ki lalo i te ikuga fakamataku!

²⁰Te Aliki, e pela latou me se moemiti tela e galo fua i te taeao, Kafai e ala ake koe, ko se manatua ne koe olotou foliga.

²¹I te taimi ne fita ei toku mafaufau kae mae toku loto,

²²Au ne valea pela me se manu; Ne seki malamalama au i a koe.

²³Ka ko au e fakapilipili faeloa ki a koe, Kae ne taofi mau ne koe toku lima.

²⁴Ne takitaki atu au ne koe ki tau fakatonuga, Kae fakamuli ko talia ei au ne koe mo te fakaaloalo.

²⁵Se a se isi mea e maua ne au i te lagi, Na ko koe fua? Tenei ko maua ne au koe, se a foki se isi mea e toe manako ei au i te lalolagi?

²⁶Toku mafaufau mo toku foitino ko gasolo o vaivai, Ka ko te Atua ko toku malosi; Ko ia ake eiloa e manako au ki ei.

²⁷A tino kola e tiaki ne latou a koe, ka 'mate; Ka fakamalaia foki ne koe a latou kola e se fakamaoni ki a koe.

²⁸Kae ki au, se mea tafasili i te gali te pili ki te Atua; E maua toku puipuiga i te Aliki Maluga, Ko folafola atu ei ne au a mea katoa ne fai ne ia!