Read Te Tusi Tapu I Te Gana Tuvalu Lomiga Lua SALAMO 74 Bible Online

SALAMO 74 - Te Tusi Tapu I Te Gana Tuvalu Lomiga Lua bible

SALAMO 74

¹[96] Te Atua, ai a ko tiaki mai ei matou ne koe penei? E a, ka ita eiloa koe ki ou tino tonu ki te se gata mai?

²Ke manatua ne koe ou tino ne filifili ne koe mo fai ou tino i aso mua eiloa, Kola ne fakasao ne koe mai te fakapologa ke fai mo ou matakaiga. Ke manatua foki ne koe a te Mauga o Siona, Tela ne nofo ei koe.

³Sasale aka i luga i mea konei ne fakamasei valevale; Ko omotou fili ne fakama'sei ne latou mea katoa i loto i te Faletapu.

⁴Ko latou foki kona ko kalaga manumalo i loto i tou Faletapu; Ko oti ne sisi olotou fuka i ei o fakailoga te lotou manumalo.

⁵E pela latou me ne tagata tua lakau, E sele lakau ki takū lasi.

⁶Ne ofa foki ne latou a laupapa fakagaligali ki olotou takū mo samala lasi.

⁷Ne fakamalepe kae faka'ka ne latou tou Faletapu; Ne soli foki ne latou te koga e tapuaki ei tino ki a koe.

⁸Ne ma'nako latou o 'ta fakapalele matou; Ne 'sunu ne latou koga tapu katoa i te fenua.

⁹Ko 'galo atu katoa a fakamailoga tapu a matou; Ko seai ne pelofeta e 'toe, Kae seai foki se tino e iloa ne ia me oti afea a te fakalavelave tenei.

¹⁰Te Atua, e gata afea te 'kata fakatauemu o omotou fili ki a koe? E a, ka muna masei latou ki tou igoa ki te se gata mai?

¹¹Ai a ko ita ei koe ma fesoasoani mai ki a matou? Ai a ko se fakamafola mai ei ou lima ki a matou? [97]

¹²Ka ko koe te Atua, ko oti ne fai koe mo omotou tupu mai te kamataga; Ko oti ne fakasao ne koe matou i taimi e uke.

¹³ Ko tou malosi tela ne vaelua ei ne koe a te tai kae tukipala foki ne koe a ulu o manu fakama'taku o te tai.

¹⁴ Ne tuki foki ne koe te ulu o te manu fakamataku ko te Leviatana [98] ke palapala, Kae tuku ne koe tena foitino ke kai ne manu o te toafa.[99]

¹⁵Ne faka'tafe ne koe a vaipuna; Ne fai foki ne koe a vaitafe 'lasi ke masa pakupaku.

¹⁶Ne fai ne koe a te ao mo te po; Ne faka'tu foki ne koe te la mo te masina ki la tulaga;

¹⁷Ko oti ne fakatuakoi ne koe a tuakoi o te lalolagi; Ne fai foki ne koe te tau 'vela mo te tau 'moko.

¹⁸Te Aliki, kae ke manatua ne koe i ou fili e 'kata fakatauemu ki a koe, A latou ne tino fapaupau kae se fia'fia ki a koe.

¹⁹Sa tiakina ne koe ou tino fakaalofa ki olotou fili sāuā; Sa puli foki i a koe ou tino ko fakasauagina!

²⁰Ke manatua te feagaiga ne fai ne koe mo matou. E isi a fakasauaga i feitu pouli katoa o te fenua.

²¹Sa fakamasiasigina latou kola e vaivai; Kae ke 'viki atu ki a koe tino ma'tiva mo tino fakaalofa.

²²Te Atua, tu ake ki luga o fakaasi tou fakamoemoega! Ke masaua i tino se amio atua e kata fakatauemu ki a koe i aso katoa.

²³Sa puli i a koe ou fili kola e kalaga mo te kaitaua, Kola e fakalogoa sale.