Read Te Tusi Tapu I Te Gana Tuvalu Lomiga Lua SALAMO 76 Bible Online

SALAMO 76 - Te Tusi Tapu I Te Gana Tuvalu Lomiga Lua bible

SALAMO 76

¹[103] Ko iloa 'lei eiloa a te Atua i Iuta; Tena igoa e faka'malu i luga i Isalaelu.

²E isi sena fale i Ielusalema; E nofo a ia i luga o te Mauga o Siona.

³Tena te koga ne fatifati ei ne ia a matasana a te fili, Pela foki olotou talita mo pelu mo olotou meatau katoa.

⁴Te Atua, ko oko eiloa tou malu! Ko oko eiloa tou 'malu fakatupu i tau fokimaiga mai te atumauga tela ne fakatakavale ei ne koe ou fili!

⁵A olotou sotia 'toa, Ko oti katoa ne ave keatea olotou mea katoa, Kae nei ko moe eiloa i te moe o te mate; Olotou malosi mo te atamai i taua ko se aoga.

⁶Te Atua o Iakopo, kafai e fakamatakutaku ne koe latou, Ko solofanua mo tino e sopo i ei ka siga kae 'mate.

⁷Te Aliki, ko koe e ma'taku ki ei a tino katoa. E seai se tino e mafai o tu i ou mua manafai ko ita koe.

⁸Ne fakailoa mai ne koe tau fakamasinoga mai te lagi; Ne ma'taku te lalolagi kae 'nofo 'mu,

⁹i te taimi tela ne tu mai ei koe o folafola mai tau fakamasinoga, O fakasao a tino puapuagatia katoa i te lalolagi.

¹⁰A te ita o tino e fai mo mea e fakaopoopo atu ei ou tavaega; A latou kola ne 'sao mai taua ka tausi ne latou ou aso fakailoga.[104]

¹¹Tuku atu ki te Aliki tou Atua a mea ne tauto koe ki ei; A koutou fenua katoa kola e pili mai, Ke fai meaalofa koutou ki a ia. E fai ne te Atua tino ke ma'taku ki a ia;

¹²E fakamalalo ne ia a pelenise fakamatamata Kae fakamatakutaku ne ia a tupu takutakua.