Read Te Tusi Tapu I Te Gana Tuvalu Lomiga Lua SALAMO 77 Bible Online

SALAMO 77 - Te Tusi Tapu I Te Gana Tuvalu Lomiga Lua bible

SALAMO 77

¹[105] Au e tagi pakalaga ki te Atua; Au e tagi pakalaga, kae lagona ne ia.

²I taimi o puapuaga, au e talo ki te Aliki; i po katoa au e sisi oku lima kae 'talo, Kae se maua eiloa ne au se fakamafanafanaga.

³Kafai e mafaufau au ki te Atua, au e manava fi'ta; Kafai e mafaufau loto au, E tupu ei toku loto vaivai.

⁴E fai ne ia au ke se to taku moe; Ko oko foki toku fanoanoa, ko se mafai ne au o faipati.

⁵Au ko mafaufau ki aso ko 'teka, Kae masaua foki ne au a tausaga ko palele atu.

⁶E mafaufau 'mafa au i te po katoa;[106] E mafaufau 'loto au kae fai ifo ei au ki a au eiloa penei:

⁷“E a, ko te Aliki nei ka se saga faeloa ki a matou? E mata e se toe fiafia mai a ia ki a matou?

⁸Kae a, ko gata nei tena alofa ki a matou? Ko se aoga nei ana folafolaga?

⁹E a, ko puli i te Atua o alofa mai? Ko tena alofa nei ko sui ne tena ita?”

¹⁰Ne fai ake aku muna penei, “Tenei te mea tafasili e faka'mae ne ia toku loto, i te Atua ko seai sena malosi.”[107]

¹¹Te Aliki, ka manatua ne au au galuega ma'losi; E toe fakamasausau ne au au galuega fakaofoofogia ne fai i aso ko 'teka.

¹²Ka mafaufau au ki mea katoa ko oti ne fai ne koe; Ka mafaufau 'loto au ki mea fakaofoofogia katoa ne fai ne koe.

¹³Te Atua, e 'malu mea katoa e fai ne koe. E seai foki se atua e sili atu i a koe.

¹⁴A koe ko te Atua tela e fai ne koe vavega; Ne fakaasi foki ne koe tou malosi ki fenua katoa.

¹⁵Ko tou 'mana foki tela ne fakasao ei ne koe ou tino, Ko mokopuna o Iakopo mo Iosefa

¹⁶Te Atua, a te mateaga ne vai a koe, ne ma'taku latou, A te moana 'poko foki ne polepole.

¹⁷Ko ligi ifo ne kaumana te ua; Ne pa'pa mo fatili mai te lagi Kae lapalapa foki mo uila i koga katoa.

¹⁸A te gulu o tou fatili ko salalau atu, Ka ko te lapaga o uila ko maina atu ki te lalolagi katoa; Ko polepole kae galulu te lalolagi.

¹⁹Ne sasale koe i va o galu; Ne saele foki koe i te moana 'poko, Ka ko ou kalafaga ne se matea.

²⁰Ne takitaki ne koe tou fenua pela me se tausi mamoe, Ka ko Mose mo Alona ko takitaki o latou.