Read Te Tusi Tapu I Te Gana Tuvalu Lomiga Lua SALAMO 78 Bible Online

SALAMO 78 - Te Tusi Tapu I Te Gana Tuvalu Lomiga Lua bible

SALAMO 78

¹[108] Toku fenua, fakalogo mai ki aku akoakoga, Kae saga tonu mai foki ki aku muna e fai atu.

² Ka faipati atu au ki a koutou ki tala fakatusa, Kae fakamalamalama atu foki ne au ki a koutou a mea 'funa ko teka,

³Ko mea kola ko oti ne lagona kae iloa ne tatou, Ko mea foki kona ne fai mai ei 'tou tamana.

⁴Ka se 'funa ne matou mai motou tamaliki; Kae ka fakailoa atu ne matou ki sua kautama e uiga ki te 'mana o te Aliki mo ana galuega takutakua pela foki Mo mea fakaofoofogia ne fai ne ia.

⁵Ne tuku atu ne ia a tulafono ki te fenua o Isalaelu, Mo fakatonuga ki te fanauga a Iakopo. Ne fakatonu ne ia 'tou tupuga ke akoako atu ana tulafono ki olotou tamaliki,

⁶Ko te mea ke tauloto ne sua kautama a mea kona, Kae ke taku atu foki ki olotou tamaliki.

⁷I te faiga tena, ka talitonu latou ki te Atua Kae se puli foki i a latou ana mea ne fai; Ka tausi faeloa foki ne latou ana fakatonuga.

⁸Ka se fai latou pela mo olotou tupuga, Kola ne tino 'teke kae se faka'logo. A te lotou fakatuanaki ki te Atua e se tumau, Kae e se fakamaoni foki a latou ki a ia.

⁹A tino Efalaima mo olotou mea tau, Ne kausana mo matasana; Kae ne tele ma'taku fua latou i te aso ne fai ei taua.

¹⁰Seki tausi ne latou te lotou feagaiga mo te Atua; Ne seki tausi foki ne latou ana tulafono.

¹¹Ne puli i a latou ana mea ne fai, Mo vavega kola ne matea ne latou e fai ne ia.

¹² Ne fai ne te Atua a vavega, Kae onoono ki ei olotou tupuga, i te kogā laukele o Soani i te fenua o Aikupito.

¹³ Ne vaelua ne ia te tai ke sasale latou i ei; Kae taofi foki ne ia te vai ke tu pela me se pui.

¹⁴ Ne takitaki ne ia latou i te ao ki te kaumana, Ka ko te po katoa ne takitaki ne ia ki te mainaga o te afi.

¹⁵Ne 'fo ne ia kaupapa i te vao ke ma'fa, Kae ne fainu ne ia latou ki vai mai te koga 'poko.

¹⁶Ne fakasali mai ne ia te vai mai te kaupapa, Kae faka'tafe ne ia te vai pela me se vaitafe.

¹⁷Kae tumau faeloa te agasala o latou ki te Atua, Kae ne 'teke atu foki latou ki te Atua Maluga i te vao.

¹⁸ Ne tofotofo ne latou te Atua i te ma'nako malosi atu o latou ki ne meakai.

¹⁹Ne faipati ita atu latou ki te Atua penei: “E a, e mafai ne te Atua o aumai meakai ma tatou i te vao nei?

²⁰E tonu me ne 'fo ne ia te papa kae ne 'tafe malosi mai ei te vai; Kae mata e mafai ne ia o tuku mai ne falaoa mo ne kano o manu ma tatou?”

²¹Tela la, ne ita te Aliki i te lagonaga ne ia olotou muna; Ne fakaoso atu ei ne ia te afi ki tena fenua ka ko tena kaitaua foki e gasolo ake eiloa o lasi ki a latou,

²²Me ne seki fakatuanaki latou ki a ia, Kae ne seki talitonu foki me mafai ne ia o fakaola latou.

²³Kae ne faipati atu a ia ki te lagi, Kae ne fakatonu atu ke tala ona mataloa;

²⁴ Ne tuku ifo ne ia a meakai mai te lagi, Ko manai ne 'kai ei latou.

²⁵Tela kai ei latou ki meakai a agelu, Kae tuku atu foki ne te Atua mea katoa e ma'nako latou ki ei.

²⁶Ne fakaagi ei ne ia te matagi Mai te saegala, kae fakagasue foki ne ia ki tena mana a te matagi mai te sulu;

²⁷Ne tuku mai foki ne ia a manu eva ki tena fenua, Pela eiloa mo te uke o one o te matafaga;

²⁸Ne 'to ifo manu eva kona ki te kogaloto o te koga e 'nofo ei latou, E pela foki i tafa o olotou faleie.

²⁹Tena, kai ei latou ki ei kae ma'kona; Ne tuku atu foki ne te Atua ki a latou a mea e ma'nako latou ki ei.

³⁰Ne 'kai faeloa latou ki ei, kae seki loto ma'lie eiloa latou i ei.

³¹I te taimi ne ita ei te Atua ki a latou, Kae ne tamate ne ia olotou tagata malosi, Ko tamataene malielie kona o Isalaelu.

³²E ui eiloa i mea katoa kona, Kae mautakitaki eiloa te fai agasala o te fenua; E ui foki eiloa i vavega ne fai ne te Atua, kae se talitonu eiloa.

³³Tela la, ne fakaoti ne te Atua olotou aso pela me se manava, Mo olotou ola foki ko fakaoti i se mala tupu fakavave.

³⁴I taimi katoa e tamate ei ne ia a nisi tino o latou, Kae fatoa fuli atu ki a ia latou kola e 'toe; Ne sala'mo latou kae 'talo fakamaoni atu ki a ia.

³⁵Ne masaua ne latou i te Atua ko te lotou puipuiga, Ne fesoasoani mai foki te Atua malosi ki a latou.

³⁶A ko olotou muna katoa ko te 'loi faeloa; E seai eiloa se muna tonu i olotou muna ne fai.

³⁷ Ne seki fakamaoni latou ki a ia; Ne seki fakamaoni foki latou ki te lotou feagaiga mo ia.

³⁸Ka ko te Atua ne alofa faeloa ki ona tino. Ne fakamagalo ne ia olotou agasala, Kae ne seki fakamalaia foki ne ia latou. E uke taimi ne kufaki ne ia tena kaitaua, Kae kolomaki foki ne ia tena ita.

³⁹Ne masaua ne ia i a latou ne tino fua e 'mate, Pela mo se matagi e agi mai, te mea foki loa ko galo atu.

⁴⁰E uke taimi ne 'teke atu ei latou ki a ia i te vao; E uke foki taimi ne fakafanoanoa ei ne latou a ia!

⁴¹E tofotofo sale faeloa ne latou te Atua, Kae faka'mae ne latou te Atua Tapu o Isalaelu.

⁴²Ko puli i a latou tena mana malosi, Mo te aso tela ne fakaola ei ne ia latou mai olotou fili,

⁴³Mo ana galuega 'mana mo ana vavega, i te kogā laukele o Soani i te fenua o Aikupito.

⁴⁴ Ne fakaliu toto ei ne ia a vaitafe, Ko se maua ei ne tino Aikupito ne vai mo olotou inu.

⁴⁵ Ne aumai ne ia a lago ki a latou, E faka'fita ei latou, Mo lane kola ne fakamasei ne latou te olotou laukele.

⁴⁶ Ne aumai ne ia a se akelise ke kai a fuaga o olotou fatoaga, Kae faka'masei foki olotou fatoaga.

⁴⁷ Ne tamate ne ia olotou toga vine ki te vaiua fatu, Mo olotou mati ki te kiona,

⁴⁸Ne tamate ne ia olotou pulumakau ki te vaiua fatu, Mo olotou mamoe ki te uila.[109]

⁴⁹Ne fakamalaia ne ia latou i te fakamaligiifoga o tena ita mo tena kaitaua lasi; Ne fanatu e pela me se avefekau a te mate.

⁵⁰Ne seki taofi ne ia tena kaitaua, io me fakasao olotou ola, Kae ne tamate ne ia latou i te mala.

⁵¹ Ne tamate foki ne ia a toekimua tagata i kaiga katoa i Aikupito.

⁵² Fakamuli ifo, takitaki ei ne ia tena fenua keatea pela me se tausi mamoe, Kae taki ne ia latou i te vao.

⁵³ Ne takitaki ne ia latou ke sao 'lei, Kae ne seki ma'taku ei latou; Ne malemu olotou fili i te tai.

⁵⁴ Ne ave ne ia latou ki tena fenua tapu, Ki mauga kola ne maua ne ia i tena manumalo.

⁵⁵ Ne afuli ne ia keatea a tino tonu o fenua kona, i te oloatuga o tino o tena fenua, Kae ne vaevae foki ne ia te lotou laukele ki matakaiga o Isalaelu, Ka ko olotou fale foki ne fai mo fale o tino o tena fenua.

⁵⁶ Ka ko latou ne 'teke atu ki te Atua Tafasili i te Malosi, Kae tofotofo ne latou a ia. Ne seki faka'logo latou ki ana fakatonuga,

⁵⁷Ka ko latou ne 'teke kae se fakamaoni ki te Atua, E pela eiloa mo olotou tamana, E se fakatuagagina e pela me se matasana piko.

⁵⁸Ne fakaitaita ne latou a ia i olotou koga tapuaki fapaupau, Ne fakakaitaua foki ne latou a ia ki olotou tupua faite.

⁵⁹Ne ita te Atua i te laveaga ne ia, Tena tiaki lele ei ne ia tena fenua.

⁶⁰ Ne tiaki ne ia tena fale tapuaki i Sailo, [110] Ko te koga tela ne nofo ei a ia fakatasi mo tatou.

⁶¹ Ne tuku atu ne ia a 'tou fili ke puke ne latou a te Pusa o te Feagaiga, Ko te fakailoga tena o tena 'mana mo tena 'malu.

⁶²Ne kaitaua a ia ki tena fenua tonu, Tela tuku atu ei ne ia latou ke tamate ne olotou fili.

⁶³Ne 'mate a tamataene i taua, tela ko seai ei ne avaga ma tamafine.

⁶⁴Ne 'mate olotou faitaulaga i taua, Ka ko olotou avaga ne seki talia ke 'tagi fanoanoa ki a latou.

⁶⁵Fakamuli ifo, ne ala ake te Aliki, pela me se tino ne moe; Pela me se tagata malosi ko patele i te uaina.

⁶⁶Tela, afuli ei ne ia keatea ona fili i te masiasi mo te takavale e se gata mai.

⁶⁷Kae ne 'teke ne ia te fanauga a Iosefa Kae ne seki filifili foki ne ia te matakaiga o Efalaima.

⁶⁸Kae ne filifili ne ia te matakaiga o Iuta mo te mauga o Siona tela e fagasele i a ia.

⁶⁹I kona ne faite ei ne ia te Faletapu, E pela mo tena fale i te lagi; Ne fakamautakitaki pela eiloa mo te lalolagi, E tumau eiloa ki te se gata mai.

⁷⁰ Ne filifili ne ia tena tavini ko Tavita; Ne aumai ne ia mai te malae o mouku lausiusi,

⁷¹I koga kola e leoleo ei ana mamoe, Kae ne fai ne ia ke fai mo tupu o Isalaelu, Te tausi mamoe o te fenua o te Atua.

⁷²Ne tausi ne Tavita latou i te fakamaoni katoatoa, Kae ne takitaki foki ne ia latou ki tena atamai.