Read Te Tusi Tapu I Te Gana Tuvalu Lomiga Lua SALAMO 79 Bible Online

SALAMO 79 - Te Tusi Tapu I Te Gana Tuvalu Lomiga Lua bible

SALAMO 79

¹[111] Te Atua, a tino pouliuli ko puke malo ne latou tou fenua. Ne fakamasei ne latou tou Faletapu 'malu, Kae tiaki ne latou a Ielusalema me ko masei valevale.

²Ne tiaki ne latou a foitino o ou tino ke kai ne manu eva, Mo foitino o au tavini ke kai ne manu fe'kai o te vao.

³Ne fakamaligi ne latou a toto o ou tino pela me se vai; Ka ko 'tafe atu ei te toto pela me se vai i Ielusalema katoa, Kae seai se tino ne 'toe o tanu a tino 'mate.

⁴Ne fakaitaita mai a fenua pili ki a matou, Ne kata fakatauemu mai foki a latou ki a matou.

⁵Te Aliki, koe na ka ita faeloa ki a matou ki te se gata mai? Ka tumau eiloa tou ita pela me se afi?

⁶Fakasaga atu tou ita ki fenua kola se tapuaki ki a koe, Mo tino foki kola e se 'talo atu ki a koe.

⁷Ko oti ne tamate ne latou ou tino Kae fakamasei foki ne latou tou fenua.

⁸Sa fakasala mai ne koe matou ona ko agasala a omotou tupuga, Kae alofa mai nei ki a matou; me ko seai se motou fakamoemoega.

⁹Te Atua, fakaola mai, kae fesoasoani mai ki a matou; Fakasao kae fakamagalo mai omotou agasala, Ona ko te 'malu o tou igoa.

¹⁰Ai a e fesili mai ei a fenua ki a matou penei, “Tefea te otou Atua?” Fai aka ke lavea ne matou, me ko fakasala ne koe a fenua; Ona ko te fakamaligiga ne latou a toto o au tavini!

¹¹Fakalogo ake ki te manava fita o pagota, kae mai tou mana lasi, Fakasaoloto ake latou kola ko fakasala ki te mate.

¹²Te Aliki, taui atu fakafitu ki fenua, E tusa mo olotou muna ma'sei ne fai atu ki a koe.

¹³Ka ko matou, ko ou tino, ko mamoe o tau lafu mamoe, Ka fakafetai atu ki a koe ki te se gata mai, Kae tavae atu foki ki a koe i taimi katoa.