Read Te Tusi Tapu I Te Gana Tuvalu Lomiga Lua SALAMO 80 Bible Online

SALAMO 80 - Te Tusi Tapu I Te Gana Tuvalu Lomiga Lua bible

SALAMO 80

¹[112] Te Tausi Mamoe o Isalaelu, fakalogo mai ki a matou; A koe te takitaki o te lafu mamoe, Saga mai ki a matou, ke nofo koe i tou nofoga Aliki i luga aka o kapakau o kelupi.

²Fakaasi atu koe ki matakaiga o Efalaima, Peniamina mo Manase. Fakaasi mai tou malosi ki a matou; vau o fakaola matou!

³Te Atua, toe fakafoki mai matou! Fakaasi mai ki a matou tou alofa 'nau ke ola ei matou!

⁴Te Aliki te Atua e o ia te malosi katoatoa, E gata afea tou ita ki talosaga a tou fenua?

⁵Ko oti ne fagai ne koe matou ki te fanoanoa, Kae fainu foki matou ki te ipu lasi o loimata.

⁶Ne fai ne koe a fenua 'pili mai ke fakatau'fao i te motou fenua, Ka ko omotou fili foki e fakatauemu mai ki a matou.

⁷Te Atua Malosi, toe fakafoki mai matou! Fakaasi mai ki a matou tou alofa 'nau, ke ola ei matou!

⁸Ne aumai ne koe a te vine mai Aikupito; Ne afuli keatea ne koe a nisi fenua kae 'toki ne koe a te vine i te lotou laukele.

⁹Ne vele 'ma ne koe te koga tena mo fakaola te vine; Ne 'lave mautakitaki ona aka kae salalau atu i te fenua katoa.

¹⁰A mauga mo lakau 'lasi ko alasi, ko ufi katoa i tena malūga, Mo te malūga o ana kaula.

¹¹Ne oko atu ona kaula ki te Tai Metitilani, Ne oko atu foki eiloa ki te Vaitafe o Eufilate.

¹²Ai a ne ofa ei ne koe ona pui ki lalo? Kafai e fakatafa atu so se tino i te koga tena, E mafai ne ia o kaisoa ona fuataga.

¹³E lakalaka foki ki lalo ne puaka vao ko kai ei ne manu fe'kai katoa.

¹⁴Te Atua Malosi, saga mai ki a matou! Kilokilo mai ki a matou mai te lagi; Vau o fakaola ou tino!

¹⁵Vau o fakasao te vine tenei ne toki ne koe, Ko te tamā vine tenei ne fai ne koe ke olaola 'lei!

¹⁶Ne 'kati ne omotou fili kae 'sunu ki te afi; Kilo kaitaua atu koe ki a latou kae fakamalaia atu!

¹⁷Puipui kae atafai atu ki tino ne filifili ne koe, Te fenua ne fai ne koe ke malosi!

¹⁸Ko se toe olo eiloa matou keatea mo koe; Kae tausi matou ke ola, ko tavae atu ei matou ki a koe.

¹⁹Te Aliki te Atua Malosi, toe fakafoki mai matou ki a koe. Fakaasi mai foki tou alofa 'nau ki a matou, ka ola ei matou.