Read Te Tusi Tapu I Te Gana Tuvalu Lomiga Lua SALAMO 81 Bible Online

SALAMO 81 - Te Tusi Tapu I Te Gana Tuvalu Lomiga Lua bible

SALAMO 81

¹[113] Kalaga mo te fiafia ki te Atua te 'tou 'puiga; Usu atu vikiga ki te Atua o Iakopo

²Kamata te pese, kae ta samupelini; Ta mai ne pese gali i kitala mo faili.

³Ili te pu mō te aso fakailoga; i taimi e sae ei te masina, mo taimi e sulu ei.

⁴A te mea tenei se tulafono ki a Isalaelu Se fakatonuga foki mai te Atua o Iakopo.

⁵Ne tuku atu ne ia te mea tena ki te fenua o Isalaelu, i tena fanatuga o fai taua ki te fenua o Aikupito. Ne lagona ne au se leo fou e fai mai penei,

⁶“Ne ave ne au keatea amoga 'mafa i otou tua; Ne tuku foki ne au ki lalo otou amoga 'mafa.

⁷ Kafai ko maua koutou ne fakalavelave, Ko ka'laga mai ei koutou ki a au, Kae ka fakaola ne au a koutou. E tali atu au ki a koutou mai toku koga muni i te afā; Ne tofotofo foki ne au koutou i te vai o Melipa.

⁸Toku fenua, fakalogo mai ki aku polopolokiga; Isalaelu, ko oko eiloa toku manako ke fakalogo mai koe ki a au!

⁹ Se 'tau eiloa mo koutou o tapuaki atu ki se atua fakaatea.

¹⁰Au ko te Aliki te Atua o koutou, tela ne aumai ne ia koutou mai te fenua o Aikupito. Faka'maga otou gutu ke fagai ne au koutou.

¹¹“Ka ko toku fenua ko se fia saga mai eiloa ki a au; A Isalaelu foki, ko se fakalogo mai ki a au.

¹²Tela ne tuku atu ne au latou ke olo mo olotou loto makeke, Ke fai eiloa te mea e 'loto latou ki ei.

¹³Ko oko eiloa toku manako ki toku fenua ke faka'logo mai ki a au, Mo toku manako foki ke tautali mai ki a au!

¹⁴Ka fakatakavale fakavave eiloa ne au olotou fili, Kae fakatakavale foki tino katoa e ita ki a latou.

¹⁵A tino kola e takalialia ki a au, ka ifo i te ma'taku i oku mua; A te olotou fakasalaga e seai se gatamaiga.

¹⁶Ka fagai ne au koutou ki saito tafasili i te lei, Kae fakama'kona foki ne au koutou ki hani.”