Read Te Tusi Tapu I Te Gana Tuvalu Lomiga Lua SALAMO 83 Bible Online

SALAMO 83 - Te Tusi Tapu I Te Gana Tuvalu Lomiga Lua bible

SALAMO 83

¹[115] Te Atua, sa nofo 'mu; sa nofo faka'logo, sa filemu!

²Kiloke! Ko fai taua atu ou fili, Ka ko latou kola e takalialia ki a koe, ko teke atu.

³Ko fai olotou togafiti 'funa ki ou tino; Kae fai foki olotou pulepulega ma'sei, Ki tino kola e puipui ne koe.

⁴Olotou muna, “O'mai ke fakamasei ne tatou te lotou fenua, Ko te mea ke puli a Isalaelu ki te se gata mai.”

⁵Ko loto tasi latou i olotou fuafuaga, Ke fai se kautau o 'teke atu ki a koe:

⁶A tino kona ne tino Etoma, Isamaeli, Moapi, mo tino Hakala,

⁷E pena foki mo tino Kepola, Amoni, Amaleka, Filisitia mo Tulo.

⁸A Asulia ko kau foki ki a latou, Ko fai mo fesoasoani malosi o te fanauga a Lota.

⁹ Fai atu ki a latou a te mea ne fai ne koe ki tino Mitiana, Mo Sesela, mo Iapino i te Vaitafe o Kisona.

¹⁰Ne fakatakavale ne koe a latou i Enetolo, Ka ko olotou foitino ne pala i luga i te laukele.

¹¹ A te mea tela ne fai ne koe ki a Olepa mo Sepa, Ke fai foki pena ki olotou takitaki. Fakatakavale ake olotou pule pela mo te mea ne fai ne koe ki a Sepa mo Salemuna,

¹²Kae fai ake olotou muna penei, “Ka puke mo tatou te fenua o te Atua.”

¹³Toku Atua, fakasalalau atu latou pela me ne pefu, E pela foki me ne mouku pakupaku e agina i te matagi.

¹⁴E pela mo te vao e 'ka i te afi, E pela foki mo mauga e 'ka i te afi,

¹⁵Afuli atu latou keatea ki tou afā, Kae fakamatakutaku latou ki tou matagi fakamataku.

¹⁶Te Aliki, fakamasiasi ake latou ke 'ma, Ko te mea ke iloa ne latou tou 'mana.

¹⁷Ke fakatakavale ake latou, kae ke ma'taku ki te se gata mai; Ke 'mate foki latou mo te masiasi.

¹⁸Ko te mea ke iloa ne latou me ko koe fua te Aliki e tokotasi, Ko te pule tafasili i te lalolagi katoa.