Read Te Tusi Tapu I Te Gana Tuvalu Lomiga Lua SALAMO 85 Bible Online

SALAMO 85 - Te Tusi Tapu I Te Gana Tuvalu Lomiga Lua bible

SALAMO 85

¹[117] Te Aliki, ko oko eiloa tou alofa ki tou fenua; Ne toe fakafoki ne koe te manuia o Isalaelu.

²Ne fakamagalo ne koe olotou agasala, Ne 'solo foki ne koe olotou mea 'se katoa.

³Ko fakagata tou kaitaua ki a latou, Ko palele atu foki tou ita malosi ki a latou.

⁴Te Atua te motou fakaola, toe fakafoki atu matou ki a koe, Kae fakagata tou se fiafia ki a matou!

⁵E a, ka tumau faeloa tou ita ki a matou ki te se gata mai? E a, ka se gata eiloa tou ita?

⁶Fakafou ake te motou malosi, Ka ko matou tou fenua ka 'viki atu ki a koe.

⁷Te Aliki, fakailoa mai ki a matou tou alofa tumau, Kae aumai ki a matou tou fesoasoani o fakaola matou.

⁸Au e fakalogologo ki muna a te Atua; Me e aumai ne ia te filemu ki a tatou tena fenua tonu, Manafai ko se toe foki tatou ki o'tou faiga va'lea.

⁹E tonu eiloa me toka faeloa a ia o fakasao a tino kola e ava atu ki a ia, Ka ke tumau tena fakaola mai ki te tou fenua.

¹⁰A te alofa mo te fakamaoni ka fakatasi, A te amiotonu mo te filemu ka olo tasi.

¹¹A te fakamaoni o te tino e fanake ki luga mai te lalolagi, Ka ko te amiotonu a te Atua ko fanaifo mai te lagi.

¹²E tuku mai ne te Aliki te manuia ki a tatou, Mo te tou laukele foki ke fua 'lei.

¹³A te amiotonu e fano i mua o te Aliki, O fakatoka te alatu mo ia.