Read Te Tusi Tapu I Te Gana Tuvalu Lomiga Lua SALAMO 86 Bible Online

SALAMO 86 - Te Tusi Tapu I Te Gana Tuvalu Lomiga Lua bible

SALAMO 86

¹[118] Te Aliki, fakalogo mai, kae tali mai ki a au, i a au ko oko eiloa i toku vaivai, Kae seai ake foki soku fesoasoani.

²Fakasao mai au mai te mate, i a au foki e fakamaoni ki a koe; Fakasao mai au, i a au ko tau tavini tela e talitonu ki a koe.

³A koe ko toku Atua, alofa mai ki a au i tou alofa 'nau; i a au tenei e 'talo atu ki a koe i aso katoa.

⁴Te Aliki, fakafiafia mai tau tavini, i aku talosaga konei e fai atu ki a koe.

⁵A koe e 'lei kae loto fakamagalo ki a matou, Kae fonu foki koe i te alofa tumau ki tino katoa kola e 'talo atu ki a koe.

⁶Te Aliki, fakalogo mai ki taku 'talo; Kae fesoasoani mai foki ki aku fakatagi atu.

⁷Au e kalaga atu ki a koe i taimi e maua ei au ne fakalavelave, Me e tali mai koe ki aku 'talo.

⁸Te Aliki, e seai ake eiloa se Atua e pau mo koe, E seai eiloa se tino e mafai ne ia o fai a mea kola ko oti ne fai ne koe.

⁹ A fenua katoa kola ne faite ne koe, E o'mai katoa o ifo atu ki a koe. Ka tavae atu latou ki tou maluga.

¹⁰Ko koe ko te Atua Malosi; Ko koe fua e fai ne koe a mea fakaofoofogina.

¹¹Te Aliki, akoako mai ki a au a mea e 'tau mo au o fai, Ka fakalogo au ki ei mo te fakamaoni; Akoako mai ke tavini atu au ki a koe mo te loto katoatoa.

¹²Te Aliki toku Atua, e tavae au ki a koe mo toku loto katoatoa; Kae folafola atu ne au tou 'malu ki te se gata mai.

¹³Ko oko eiloa i te lasi o tou alofa tumau ki a au! Ko oti ne fakasao ne koe au mai te 'poko o te tanuga.

¹⁴Te Atua, a tino fakamaualuga ko 'tu mai o laga taua mai ki a au; Se potukau fakasaua, e taumafai o tamate au, Ko tino kola e se faka'logo ki a koe.

¹⁵Te Aliki, a koe ko te Atua e alofa mo te alofa 'nau, E tuai tou ita kae alofa faeloa koe mo te fakamaoni.

¹⁶Saga mai kae alofa mai ki a au, i a au e tavini ki a koe e pela mo faiga a toku matua.

¹⁷Te Aliki, fakailoa mai se fakamaoniga o tou atafai mai, Ko te mea ke ma'vale a tino kola e ita mai ki a au, Manafai e matea ne latou i a koe e fakamafanafana mai kae fesoasoani mai ki a au.