Read Te Tusi Tapu I Te Gana Tuvalu Lomiga Lua SALAMO 89 Bible Online

SALAMO 89 - Te Tusi Tapu I Te Gana Tuvalu Lomiga Lua bible

SALAMO 89

¹[121] Te Aliki, au e usu pese faeloa ki tou alofa tumau, Kae folafola faeloa ne au tou fakamaoni ki te se gata mai.

²E iloa ne au i tou alofa e tumau ki te se gata mai, A tou fakamaoni e mautakitaki pela mo te lagi.

³Ne fai mai koe penei, “Ko oti ne fai ne au te feagaiga mo te tino ne filifili ne au; Ko oti ne tauto au ki taku tavini ko Tavita penei,

⁴‘Ka fai faeloa mo tupu se tino e vau mai tou gafa; E fakatumau ne au tou malo ki te se gata mai.’ ”

⁵Te Aliki, e usu pese atu a kau o te lagi ki au mea fakaofoofogia e fai; E 'viki foki latou ki tou fakamaoni.

⁶Te Aliki, e seai eiloa se tino e tokotasi i te lagi e pau mo koe, E seai foki se atua e tusa mo koe.

⁷E fakaaloalogina koe i te fakapotopotoga a tino tapu; Kae e ma'taku foki latou katoa i a koe.

⁸Te Aliki te Atua e o ia te malosi katoatoa, E seai se tino e malosi e pela mo koe; E fakamaoni koe i mea katoa.

⁹E pule koe i te tai fakamataku; E fakamalū ne koe ona galu fakamataku.

¹⁰Ne tuki palapala kae ta ne koe a te manu fekai ko Lahapa[122] kae ne tamate; Ko tou malosi foki ne fakatakavale ei ne koe ou fili.

¹¹A te lagi mo te lalolagi e o koe; Ne faite ne koe te lalolagi mo mea katoa i ei.

¹²Ne fai foki ne koe a te feitu ki matu mo saute; Pela foki mo te Mauga o Tapola mo te Mauga o Helemoni, e usu pese fiafia ki a koe.

¹³Ko oko eiloa i te lasi o tou 'mana! Ko oko foki eiloa i te lasi o tou malosi!

¹⁴A tou malo e fakavae ki te amiotonu mo te fai mea tonu; E iai te alofa mo te fakamaoni i au mea katoa e fai.

¹⁵Amutia a tino kola e tapuaki ki a koe i pese, Kola e ola i te mainaga o tou alofa!

¹⁶E fia'fia latou i aso katoa ona ko koe, Kae tavae atu ki a koe ona ko tou alofa atafai.

¹⁷E aumai ne koe te manumalo takutakua ki a matou; Ne fai ne koe matou ke manumalo ona ko tou alofa.

¹⁸Te Aliki, koe ko te motou puiga, Ko koe te Atua Tapu o Isalaelu, ne aumai ne koe te motou tupu.

¹⁹E isi se fakaasiga ne oko ki au tavini fakamaoni i aso mua, Tela ne faipati ei koe penei, “Ko oti ne tuku ne au te fesoasoani ki te sotia takutakua; Ko oti foki ne tuku ne au a te nofogaaliki ki te tino ne filifili ne au mai tino.

²⁰ Ko oti ne fai ne au taku tavini ko Tavita ke fai mo tupu, i te 'miliga ne au ki te sinu tapu.

²¹A toku malosi e fakatasi faeloa ki a ia, Ko toku mana foki e malosi ei a ia.

²²E se toe takavale lele a ia i ona fili; A tino amio masei e se mafai o fakatakavale ne latou a ia.

²³Ka tuki palapala ne au ona fili Kae tamate foki so se tino tela e takalialia ki a ia.

²⁴Au e alofa faeloa kae fakamaoni ki a ia; Ka fai faeloa ne au a ia ke manumalo.

²⁵E fakaasi ne au tena malo, Mai te Tai Metitilani ke oko ki te Vaitafe o Eufilate.

²⁶Ka fai mai a ia ki a au penei, ‘A koe ko toku tamana mo toku Atua; A koe foki ko toku 'puiga mo toku fakaola.’

²⁷ Ka fai ne au a ia mo fai taku toekimua tagata, Ke sili atu a ia i tupu katoa.

²⁸Ka tausi faeloa ne au taku feagaiga mo ia, A taku feagaiga mo ia e tumau ki te se gata mai.

²⁹Ka fai faeloa mo tupu, te tino tela e tupu mai i a ia; A tena malo e tumau pela mo te lagi.

³⁰“Kae kafai ana fanau e se tausi ki taku tulafono Kae se faka'logo foki latou ki aku fakatonuga,

³¹Kafai latou se tausi ki aku fakatonuga, Kae se faka'logo foki ki aku tulafono,

³²Ka fakasala ne au latou ona ko olotou agasala; Kae fakapuapuaga foki ne au latou ona ko olotou mea 'se.

³³Kae ka se gata mai toku alofa ki a Tavita, Ka tausi foki ne au taku feagaiga ki a ia.

³⁴E se mafai ne au o ofa taku feagaiga mo ia, io me ave keatea se vaega o te feagaiga ne fai ne au ki a ia.

³⁵“Tenei eiloa taku tautoga i toku igoa 'malu, Kae seai ake foki: Ka se toe loi lele eiloa au ki a Tavita.

³⁶Ka fanafanau faeloa a ia, Ka tumau toku tausi ki tena malo e pela eiloa mo te tumau o te mainaga o te la.

³⁷Ka tumau e pela eiloa mo te masina, Ko ia tena ko te molimau fakamaoni i te lagi.”

³⁸Ka ko koe ko ita ki tau tupu ne filifili; Ko oti ne tiakina kae 'teke ne koe a ia.

³⁹Ne ofa ne koe a tau feagaiga mo tau tavini. Ko oti foki ne pei keatea tena foualiki ki te koga pelapela.

⁴⁰Ko oti ne ofa ne koe a pui o tena fa'kai, Ka ko tiaki foki ne koe ona olo ke malepe'lepe.

⁴¹Ka ko latou kola ne fakasili i tafa o te fa'kai, Ne kaisoa ne latou ana mea; Ne fakatauemu foki ki a ia ona tuakoi katoa.

⁴²Ko oti ne tuku atu ne koe te manumalo ki ona fili; Ko oti foki ne fakafiafia ne koe latou katoa.

⁴³Ko oti ne fakaseaoga ne koe ana meatau, Kae ne tuku atu a ia ke takavale i te taua.

⁴⁴Ko oti ne ave keatea ne koe tena tokotoko fakatupu, Kae lepe ki lalo tena nofogaaliki.

⁴⁵Ko oti ne fai ne koe a ia ke toeaina vave, Kae fakalumaluma ne koe a ia i te fakamasiasi.

⁴⁶Te Aliki, e a, koe koi 'muni eiloa mai i a au ki te se gata mai? Koi tumau eiloa tou ita e pela eiloa mo te 'ka o te afi?

⁴⁷Masaua me ko oko eiloa te toetoe o toku ola; Masaua me ne faite ne koe matou katoa ke oko mai ki ei te mate!

⁴⁸Ko oi e mafai o ola faeloa kae se mate? E mafai pefea o sao mai se tino mai te tanuga?

⁴⁹Te Aliki, ko fea fakamaoniga o tou alofa i aso mua? Ko fea foki au tautoga ne fai ki a Tavita?

⁵⁰Sa puli i a koe te muna maseigina o tau tavini; Mo taku kufakiga i muna masei katoa [123] mai tino pouliuli.

⁵¹Te Aliki, a tau tupu filifilia ko muna maseigina ne ou fili! Kae muna masei foki ki a ia i so se koga e fano a ia ki ei.

⁵²Ke tavae atu tatou ki te Aliki ki te se gata mai! Amene! Amene!