Read Te Tusi Tapu I Te Gana Tuvalu Lomiga Lua SALAMO 9 Bible Online

SALAMO 9 - Te Tusi Tapu I Te Gana Tuvalu Lomiga Lua bible

SALAMO 9

¹[11] Te Aliki, au ka tavae atu ki a koe mo toku loto katoa; Ka takutaku foki ne au a galuega 'mana katoa ne fai ne koe.

²Ka 'viki atu au mo te fiafia ona ko koe. Ka tavae atu au i vikiga ki a koe, te Atua Tafasili i te Maluga.

³I te taimi ne fakasae mai ei koe, ne 'foki ei oku fili; Ne 'siga ki lalo kae 'mate.

⁴Au fakamasinoga e 'tonu kae fakamaoni, Ne fakamasino ne koe au mo te alofa.

⁵Ne fakasala ne koe a tino pouliuli, Kae ta fakapalele foki ne koe a tino amio ma'sei; Ka se toe masaua eiloa latou.

⁶Ko seai lele eiloa ne omotou fili; Me ko oti ne fakamasei ne koe olotou fa'kai, Kae ka se toe manatua eiloa latou.

⁷Ka ko te Aliki ko te tupu ki te se gata mai; Ko oti ne fakatu ne ia tena nofogaaliki mō fai fakamasinoga.

⁸E pule ne ia te lalolagi mo te amiotonu; E fakamasino foki ne ia a malo mo te amiotonu.

⁹A te Aliki ko te olo e lafi ei a tino fi'ta, Ko te koga e 'sao ei i taimi e puapuaga.

¹⁰Te Aliki, a tino kola e iloa ne latou a koe, e fakatuanaki ki a koe; E se tiakina foki ne koe so se tino tela e vau ki a koe.

¹¹Viki atu ki te Aliki tela e pule i Siona! Fakailoa atu ki malo katoa ana mea ne fai!

¹²E masaua ne te Atua a latou kola ne fita; E se mafai o puli i a ia te lotou 'tagi, E fakasala ne ia latou kola e fai amioga se 'tau ki a latou.

¹³Te Aliki, a koe ke alofa mai ki a au! Ko matea mai ne koe toku fi'ta ona ko latou kola e ita mai ki a au! Te Aliki, fakasao mai au mai te mate,

¹⁴Ke mafai ne au o tu atu i mua o tino Ielusalema Kae taku atu ki a latou a mea katoa kola e 'viki atu ei au ki a koe. Ka fiafia au me ne fakasao au ne koe.

¹⁵Ne keli ne tino o fenua fakaatea te lua kae ne 'to eiloa latou ki ei; Ne 'tao ne latou te malei kae ne toe lavelave eiloa latou i ei.

¹⁶Ko oti ne fakaasi mai ne te Aliki a ia i ana fakamasinoga tonu, Ka ko tino amio ma'sei e pa'kia eiloa latou i olotou amioga ne fai.

¹⁷A te Mate ko te ikuga o tino amio ma'sei, Pela foki mo latou katoa kola e 'teke ki te Atua.

¹⁸A tino ma'tiva e se mafai o fakapuligina; A te fakamoemoega foki o tino puapuagatia E se mafai eiloa o galo atu.

¹⁹Te Aliki, vau! Sa tuku ne koe a tino ke manumalo i a koe! Aumai a tino se talitonu ki ou mua kae fakailoa atu ki a latou tau fakamasinoga.

²⁰Te Aliki, fakamatakutaku atu ki a latou; Fakailoa atu ke iloa ne latou i a latou ne tino fua e oko ki ei te mate.