Read Te Tusi Tapu I Te Gana Tuvalu Lomiga Lua SALAMO 92 Bible Online

SALAMO 92 - Te Tusi Tapu I Te Gana Tuvalu Lomiga Lua bible

SALAMO 92

¹[125] Te Aliki, se mea sili i te 'lei o avatu a fakafetai ki a koe, O usu atu a pese o tavaega ki tou malu, Ko te Atua Tafasili i te Maluga.

²Ko folafola atu a tou alofa tumau i taeao katoa, Mo tou fakamaoni foki i po katoa,

³O usu pese ki lakau ta'ta Fakatasi mo te leo malie o te kitala.

⁴Te Aliki, au ko fiafia ona ko au galuega 'mana; Ko usu pese ei au mo te fiafia ona ko au mea ne fai.

⁵Te Aliki, ko oko eiloa i te sili o au galuega! Ko oko eiloa i te 'loto o ou mafaufauga!

⁶Tenei sua mea e se mafai ne se tino valea o iloa; E se mafai foki o malamalama i ei se tino supa:

⁷A tino amio ma'sei ka lau olaola pela me ne mouku, Latou foki kola e fai mea 'se e mafai o maumea; Ka ko te lotou ikuga e fulu faka'ma keatea,

⁸Me ko koe te Aliki, ko te pule sili i te maluga ke oko eiloa ki te se gata mai.

⁹Ko iloa ne matou me ka 'mate katoa ou fili, Mo tino amio ma'sei katoa ka fakatakavalegina.

¹⁰Ko oti ne fai ne koe au ke malosi pela me se pulumakau vao; Ko oti ne fakamanuia ne koe au ki te fiafia.

¹¹Ko oti ne lavea ne oku mata te takavalega o oku fili, Ko oti foki ne lagona ne au te tagi o tino amio ma'sei.

¹²A tino amio'tonu ka 'tupu olaola pela mo pama lau olaola; A latou foki ka olaola lei pela mo alasi o Lepanona.

¹³A latou pela me ne lakau ne 'toki i te fale o te Aliki, E lauolaola i loto i te Faletapu o te tou Atua,

¹⁴E tiga eiloa te leva o te olaga o latou, Kae fua mai faeloa. E lau usiusi kae malosi i taimi katoa.

¹⁵Te mea nei e fakaasi mai i te Aliki e amiotonu; A ia ko toku puiga, e seai eiloa se 'se i a ia.