Read Te Tusi Tapu I Te Gana Tuvalu Lomiga Lua SALAMO 94 Bible Online

SALAMO 94 - Te Tusi Tapu I Te Gana Tuvalu Lomiga Lua bible

SALAMO 94

¹Te Aliki, a koe ko te Atua e fakasala tino; Fakaasi mai tou ita!

²A koe ko te famasino o tino katoa; Tu ake o avatu te taui e 'tau ki a latou kola e fakamaua'luga!

³E gata afea te fiafia o tino amio ma'sei? Te Aliki, e gata afea?

⁴Ka gata afea te fakamaualuga o tino ofa tulafono mo te fai'pati fia sili ki olotou agasala?

⁵Te Aliki, ko tuki pala ne latou tou fenua kae fakasaua ki ou tino.

⁶E 'ta ne latou a fafine ko 'mate olotou avaga mo tamaliki ko seai ne olotou matua, Kae tamate foki ne latou a tino fakaatea e nofo i te motou fenua.

⁷E fai mai foki latou penei, “A te Aliki se lavea mai ne ia tatou; E se matea foki ne te Atua o Isalaelu.”

⁸Toku fenua, ai a ko fai ei koutou pela me ne tino fakasupasupa? E 'poto afea koutou?

⁹A te Atua ne fai ne ia otou taliga, e a, e se lagona ne ia? Ne fai foki ne ia o'tou mata, e a, e se matea ne ia?

¹⁰A ia ko te pule o malo katoa, e a, e se fakasala ne ia latou? A ia ko te faiakoga o tino katoa, e a, e se iloa ne ia?

¹¹ E iloa ne te Aliki olotou mafaufauga; E iloa foki ne ia te se aoga o olotou manatu.

¹²Te Aliki, amutia te tino e fakatonu ne koe, Mo ia foki tela e akoakogina ne koe ki au tulafono!

¹³Ne avatu ne koe ki a ia te filemu i taimi o puapuaga, Ke oko ki te taimi e keli ei te lua ke malei i ei a tino amio masei.

¹⁴Me i te Aliki e se mafai o tiaki lele ne ia tena fenua; E se mafai foki o tuku tiaki ne ia ona tino.

¹⁵A te fakamasinoga tonu ka toe fai i loto i fono fakamasino, Kae ka 'lago ki ei a tino amiotonu katoa.

¹⁶Ko oi e tu fakatasi mo au o 'teke atu ki tino amio ma'sei? Ko oi foki e kau ki au o 'teke atu ki tino fai mea 'se?

¹⁷Moi se fesoasoani mai te Aliki ki a au, Penei ko leva ne oko vave atu au ki te fenua o tino 'mate.

¹⁸Te Aliki, au ne kalaga atu penei, “Au ko siga”; Ka ko tou alofa tumau ne taofi ake ne ia au ki luga.

¹⁹I taimi e manavase kae se toka ei au, ko koe e fakamafanafana Kae fakafiafia mai ki a au.

²⁰A koe e se kau fakatasi mo famasino amio ma'sei, Kola e fakatulafono ne latou a te mea 'se.

²¹Kola foki e fai fili ki tagata amio 'lei, Kae tamate ne latou a tino se 'tau o fakasala ki te mate.

²²Ka ko te Aliki e 'pui ne ia au; Ko toku Atua e tausi ne ia a au.

²³Ka fakasala ne ia latou ona ko olotou amio ma'sei, Kae fakapalele foki ne ia latou ona ko olotou agasala; A te Aliki te tou Atua ka fakamalaia ne ia latou.