Read Te Tusi Tapu I Te Gana Tuvalu Lomiga Lua SALAMO 96 Bible Online

SALAMO 96 - Te Tusi Tapu I Te Gana Tuvalu Lomiga Lua bible

SALAMO 96

¹Usu atu se pese fou ki te Aliki! Usu pese atu ki te Aliki, koutou te lalolagi katoa!

²Usu pese atu ki te Aliki kae viki atu ki a ia! Talai atu i aso katoa te tala 'lei i te Aliki ne fakasao ne ia tatou.

³Fakasalalau atu tena 'mana ki malo katoa; Mo ana galuega fakaofoofogia ki tino katoa.

⁴Te Aliki e sili kae 'tau eiloa mo tatou o fakama'luga ona vikiga; E 'tau o fakaaloalo malosi atu tatou ki a ia i lo atua katoa.

⁵A atua o malo katoa ne tupua fua, Ko te Aliki eiloa ne faite ne ia te lagi.

⁶E 'fonu a ia i te 'mana mo te 'malu; Ko tena Faletapu e 'fonu i te gali mo te 'mana.

⁷ Viki atu ki te Aliki, koutou tino katoa i te lalolagi nei; Viki atu ki tena 'mana mo tena 'malu.

⁸Viki atu ki te igoa 'malu o te Aliki; Vau mo se taulaga ki loto i tena Faletapu.

⁹Ifo ki lalo i mua o te Tasi Tapu manafai e oko mai a ia. Ke pole'pole koutou te lalolagi katoa i ona mua!

¹⁰Fai atu ki malo katoa penei, “Te Aliki ko te tupu! A te lalolagi ko oti ne fakamautakitaki ki ona tulaga kae ko se mafai o fakagasue. Te Aliki ka fakamasino ne ia tino mo te tonu.”

¹¹Ke fiafia te lalolagi mo te lagi! Ke 'gulu mai te tai, mo mea katoa i ei.

¹²Ke fiafia foki te laukele mo mea katoa i ei! A lakau i te vao ka ka'laga mo te fiafia,

¹³Manafai e vau te Aliki o tupu i te lalolagi. Ka pule ne ia a tino o te lalolagi mo te 'tonu.