Read Te Tusi Tapu I Te Gana Tuvalu Lomiga Lua FAATAOTO 1 Bible Online

FAATAOTO 1 - Te Tusi Tapu I Te Gana Tuvalu Lomiga Lua bible

FAATAOTO 1

¹ Ko muna faka te poto a Solomona, te tama tagata a Tavita te tupu o Isalaelu.

²Konei a muna faka te poto ka fesoasoani atu ke iloa ne koutou te poto mo muna fesoasoani lei, kae ke malamalama foki koutou i fakamunaga kola e 'loto a uiga.

³E mafai ne muna konei o akoako koutou ke ola koutou i se olaga atamai, kae ke iloa foki o amiotonu kae fai mea tonu.

⁴E mafai ne muna konei o akoako a tino valea ke poto pela foki tamataene ke lasi te lotou mea e iloa.

⁵A muna faka te poto konei e mafai foki o fakaopoopo atu ki te mea e iloa ne tagata poto, kae fakatonutonu foki ki ei a tino poto,

⁶ko te mea ke mafai o malamalama i uiga funa o muna faka te poto konei, pela foki mo mataupu kola e avake ne tino poto.

⁷Te ava ki te Aliki ko te kamataga o to poto. [1] A tino valea e se saga ki te poto, kae e se fia tauloto foki.

⁸Taku tama, saga tonu ki muna a tou tamana mo tou matua.

⁹A akoakoga a laua e fakaopoopo atu ei te lei ki ou uiga, e pela mo te pulou io me ko te malele tela e fakaopoopo ne ia te gali o koe.

¹⁰Taku tama, kafai ko fakaosooso koe ne tino agasala, sa saga ki ei.

¹¹Kafai e fai atu penei, “Vau ke olo tatou o sala se tino ke tamate! Tatou ka olo o ta a tino amiotonu kona ke fakalogotonu ei 'tou lima

¹²Kafai e maua atu ne tatou e ola kae fiafia, kae kafai ko 'ta ne tatou ko mate valevale ei!

¹³Ka olo tatou o sala vaega koloa valevale o fakafonu ei 'tou fale!

¹⁴O'mai ke kau fakatasi tatou, kae ka tufa katoa tatou i mea konei ne kaisoa ne matou.”

¹⁵Taku tama, sa tautali koe i tino pena. Fakamao keatea mai i a latou.

¹⁶E se mafai o fakatalave i se faiga o se mea masei. E toka faeloa latou o tatino.

¹⁷E seai se aoga e fakatoka ei tou tili, manafai te manu tela e taumafai koe o pei ki te tili e kilokilo mai ki a koe,

¹⁸ka ko tino pena e tao eiloa ne latou te malei mo lavelave ei latou, ko te malei tela ka mate foki eiloa i ei latou.

¹⁹A tino kaisoa kae fakasaua e isi foki eiloa ne aso e mate ei latou i olotou amioga kaisoa kona.[2] Tena te mea ka tupu ki tino e ola i se olaga fakasaua pena.

²⁰ Fakalogo mai! A te poto ko kalaga i auala mo maketi,

²¹ko kalaga malosi i mataloa o fa'kai, pela foki i koga e maopoopo ei a tino:

²²“Tino valea! E pefea te leva e manako ei koutou ke valea koutou pena? E a, ka tumau faeloa te fai o muna valea a koutou ki te poto? E a, e se mafai koutou o tauloto?

²³Fakalogo mai manafai e kote ne au koutou; ka tuku atu ne au ne manatu fakatonutonu lei, kae fakaasi atu ne au toku poto ki a koutou.

²⁴Au ne kalaga sale atu ki a koutou, o fai atu ki a koutou ke o'mai, ka ko koutou e se fia fakalogo. E se saga mai lele eiloa koutou ki a au.

²⁵Ne fakaseaoga ne koutou oku manatu fakatonutonu katoa, kae se talia foki ne koutou ke fakatonu ne au otou uiga se tonu.

²⁶Tela la, kafai e maua koutou ne fakalavelave kae ka kata atu au ki a koutou. Ka fakalili ne au koutou manafai ko oko atu te mea fakamataku ki a koutou,

²⁷manafai ko oko mai pela me se kautaufa, o aumai a matagi o fakalavelave, kae ka mae kae puapuaga foki koutou i ei.

²⁸Tena la, ka kalaga mai koutou ki te poto, kae ka se tali atu eiloa au. Ka sala mai koutou ki a au i so se koga, kae ka se maua eiloa ne koutou a au.

²⁹Ne seki saga eiloa koutou o sala te poto, kae ne teke faeloa koutou ki te Aliki.

³⁰E seki manako eiloa koutou ki se manatu fesoasoani mai i a au, io me saga tonu mai manafai ko fakatonu atu ne au koutou.

³¹Tela la, ka maua eiloa ne koutou te ikuga o otou faiga, ka salamo koutou i amioga a koutou ne fai.

³²A tino e foliki te lotou iloa ka mate me ne 'teke ne latou te poto. A tino valea e ta fakapalelegina me e se saga tonu ki mea tonu.

³³Kae so se tino e saga tonu mai ki a au ka maua ne ia te saogalemu. Ka tokagamalie tena olaga, kae seai se mea e mataku ki ei.”