Read Te Tusi Tapu I Te Gana Tuvalu Lomiga Lua FAATAOTO 11 Bible Online

FAATAOTO 11 - Te Tusi Tapu I Te Gana Tuvalu Lomiga Lua bible

FAATAOTO 11

¹A te Aliki e se fiafia ki tino kola e fakaaoga ne latou a fua se tonu, kae e fiafia ki fua tonu.

²A tino fakamatamata e se leva ko fakamasiasigina. E sili te nofo filemu.

³Kafai koe e lei, ko tena uiga koe ne takitakigina ne te faimeatonu. A tino kola e se mafai o fakatuagagina e fakamaseigina ona ko olotou uiga masei.

⁴E seai se fesoasoani e maua ne koe mai i te koloa i te taimi ka tamate ei koe, ka ko te faimeatonu e mafai ne ia o fakasao tou ola.

⁵A te faimeatonu e faka faigofie ne ia te olaga o se tagata amio lei, ka ko te tagata amio masei e fai foki eiloa ne ia a ia ke masei valevale.

⁶A te amiotonu e fakasao ne ia te tagata faimeatonu, ka ko te tino e se faka tuagagina e lavelavea foki eiloa i ona uiga masei.

⁷Kafai e mate te tagata amio masei, e 'mate fakatasi atu eiloa mo tena fakamoemoega. A te fakatuaga ki koloa e seai se mea e maua mai i ei.

⁸A tino amiotonu e puipuigina mai i fakalavelave, kae e oko fua ki tino amio masei.

⁹E mafai koe o fakamaseigina ne tala a tino fapaupau, kae e mafai koe o fakasao ne te poto o tino amiotonu.

¹⁰E fiafia te fa'kai manafai e manuia a tino faimeatonu, kae e lagona atu foki te leo o te fiafia manafai ko mate a tino amio masei.

¹¹A te fa'kai e gasolo o takutakua manafai e fakamanuia ne tino amiotonu; kae e masei valevale i muna a tino amio masei.

¹²Se uiga valea o gutu kotekote ki tino. Kafai koe se tagata poto, e nofo filemu eiloa koe.

¹³A tino gutu faitala e se mafai o fakatalitonugina ki ne mea funa, kae e mafai o talitonu koe ki te tino tela e faka tuagagina i mea pena.

¹⁴E paku te malo manafai e seai se takitaki. A te tokouke o tino fai manatu fakatonutonu ko te lei tena o te malo.

¹⁵Kafai ne tauto koe ke togi ne koe a te kaitalafu a se tino fakaatea, ka fanoanoa koe i te mea tena. E sili atu moi ne seki oso koe o fai te mea tena.

¹⁶A te fafine amio lei e fakaaloalogina, ka ko te fafine valea e fakamasiasigina. A te tagata paie e se mafai o maua ne ana tupe, kae ko te tagata galue malosi e iku ki te maumea.

¹⁷E sili te atafai ki tino. Kafai koe e se alofa ki tino, e fakamae fua ne koe a koe eiloa.

¹⁸A tino amio masei e seai se lotou manuia e maua, kae kafai e fai ne koe te mea tonu, e iku eiloa o maua se taui lei ma koe.

¹⁹So se tino e loto malosi o fai te mea tonu e ola, ka ko so se tino e tumau eiloa o fai amioga masei e iku ki te mate.

²⁰A te Aliki e se fiafia ki tino e nofo mo olotou mafaufauga masei, kae e alofa ki a latou kola e faimeatonu.

²¹E iloa eiloa ne tatou me i tino amio masei e fakasalagina eiloa, ka ko tino amiotonu e fakasao.

²²A te gali kafai e nofo i te fafine tela e seai se fautauta, e pela eiloa me se mama aulo i muagutu o se puaka.

²³A mea e manako ki ei te tino amio lei e masani o iku sale eiloa ki te lei; kafai te tino amio masei e maua ne ia a mea e manako a ia ki ei, ka ko tino ko ita katoa ki ei.[9]

²⁴A nisi tino e fakaaoga valevale fua olotou tupe kae e gasolo ake eiloa o maumea, ka ko nisi tino e fakaeteete i te fakaaogaga o olotou tupe, kae e gasolo eiloa o mativa.

²⁵Ke mafola tou lima, kae ka maumea koe. Fesoasoani atu ki nisi tino, kae ka fesoasoani mai foki a tino ki a koe.

²⁶A tino e muna 'tuku ne latou te tino tela e teu ana saito, o fakatalitali ki se togi tai lasi aka, kae e tavae ne latou te tino tela e fakapaku ne ia te togi o ana mea.

²⁷Kafai e lei ou fakamoemoega, kae ka fakaaloalogina koe ne tino, kae kafai e salasala koe ki se fakalavelave, ka maua foki eiloa ne koe se fakalavelave.

²⁸A tino kola e fakatuaga ki olotou koloa ka tatela pela me ne lau lakau i te tau o te uaga muamua, ka ko tino amiotonu ka olaola lei e pela mo lau o lakau i te tau vela.

²⁹A te tagata e aumai ne ia te fakalavelave ki tena kaiga ka iku ki te seai o ne mea a ia. A tino valea ka fai faeloa mo tavini a tino poto.

³⁰A te amiotonu [10] e aumai ne ia te ola, ka ko te fakasaua[11] e ave ne ia keatea.

³¹ A tino amio lei e maua te lotou taui lei i te lalolagi nei, tela la, e tau o iloa ne koe i tino amio masei mo tino agasala e fakasala eiloa.