Read Te Tusi Tapu I Te Gana Tuvalu Lomiga Lua FAATAOTO 14 Bible Online

FAATAOTO 14 - Te Tusi Tapu I Te Gana Tuvalu Lomiga Lua bible

FAATAOTO 14

¹A fafine atamai e atiake ne latou a kaiga nofo lei, ka ko fafine valea e ofa ne latou te nofo lei o olotou kaiga.

²Fai te mea tonu, kae ka iloa ne tino i a koe e fakalogo ki te Aliki; kafai e se fai ne koe te mea tonu, e fakaasi mai i ei i a koe e se fakalogo ki te Aliki.

³A te tagata valea kae fakamatamata e gutu faipati; a te tagata poto e puipui ne ana muna e fai.

⁴Kafai seai ne pulumakau ke toso ne latou a te mea fakamalu laukele, ko tena uiga ka seai ne saito i loto i au fale teu saito, kae kafai e isi, kae ka fonu au fale teu saito i saito. [14]

⁵A te tino molimau tela e fakatalitonugina ne tino e faipati eiloa ne ia te mea tonu, ka ko te molimau tela e se fakatalitonuga ne tino e faipati faeloa ki te loi.

⁶A tino valea e se mafai o poto, ka ko tino atamai e tauloto gofie ne latou a te poto.

⁷Fakamao keatea mai i tino valea; e seai se poto e mafai ne latou o akoako atu ki a koutou.

⁸Ai a e poto ei te tagata atamai? Me e iloa ne ia te mea e tau o fai. Ai a e valea ei te tino valea? Me e mafaufau faeloa pela me e iloa ne ia a mea katoa.

⁹A tino valea e se manatu mafa manafai e agasala, ka ko tino amio lei e manako faeloa ke fakamagalo atu latou i olotou agasala ne fai.

¹⁰A tou manuia e fiafia tokotasi eiloa koe i ei; a tou mae, e fanoanoa tokotasi eiloa koe i ei. E seai se tino e mafai o fiafia fakatasi mo koe i te taimi o tou manuia, io me fanoanoa fakatasi mo koe i te taimi o tou puapuagatia.

¹¹A te fale o te tagata amio lei e tu mautakitaki eiloa i te taimi ne siga ei te fale o te tagata amio masei.

¹² A te auala tela ne mafaufau koe pela me ko te auala tonu, e mafai o faka'se ne ia koe kae 'taki ne ia koe ki te mate.

¹³A te kata e mafai o funa ne ia te fanoanoa. Kafai ko seai se fiafia, ko tena uiga ko te fanoanoa ko sui ne ia te fiafia.

¹⁴A tino masei e maua eiloa ne latou te ikuga e tau mo latou. A tino amio lei e maua eiloa ne latou a te taui mo olotou amioga lei. [15]

¹⁵A tino valea e talitonu i so se mea; a tino poto e onoono fakalei eiloa ki olotou mea e fai.

¹⁶A tino poto e fakaeteete ke mo a e olo latou ki koga e tupu ei a fakalavelave, ka ko tino valea e se fakaeteete, e gasue o fai a mea kae se fuafua muamua olotou mea e tau o fai.

¹⁷A tino mata itaita e fai ne latou a uiga valea; a tino poto e nofo filemu eiloa. [16]

¹⁸A tino valea e maua eiloa ne latou te taui o te lotou valea, ka ko tino poto e maua ne latou te taui lei tela ko te atamai.

¹⁹A tino amio masei e ifo ki tino amiotonu kae fakamolemole ki a latou ke alofa atu.

²⁰E seai se tino e fiafia ki te tagata mativa, ke oko foki eiloa ki tena tuakoi e se fiafia foki ki a ia, ka ko te tagata maumea e tokouke ana taugasoa.

²¹Kafai koe e manako ke fiafia tou olaga, masaua o alofa ki tino mativa; masaua me se agasala manafai e takalialia koe ki se tino.

²²Kafai e galue koe mō te lei, kae ka fakaaloalogina koe ne tino; kafai e galue koe mō te masei, se auala se tena e fano koe i ei.

²³Galue ke maua mea e ola ei koe; kafai e sagasaga fua koe o gutu faipati e iku tou olaga ki te mativa.

²⁴A tino poto e maua te taui lei mo latou, ka ko tino valea e iloa fua i olotou faiga valea.

²⁵A te molimau e fakasao ne ia a ola o tino manafai e faipati ki te mea tonu; kae kafai e faipati ki te loi, ko tena uiga ko tuku atu ne ia a tino ke fakasala.

²⁶A te tino e fakaaloalo ki te Aliki e maua ne ia te tokagamalie mo te saogalemu pela foki tena kaiga katoa.

²⁷E a, a koe e manako ke mao koe keatea mai i te mate? Te ava ki te Aliki ko te punavai tena o te ola.

²⁸A te takutakua o te tupu e iloa i te tokouke o tino i tena pulega, kae kafai seai ne tino i tena pulega, ko tena uiga e seai sena aoga.

²⁹Kafai koe e nofo filemu, koe se tagata poto, kae kafai e mata itaita koe, e fakaasi fua ne koe ki tino i a koe se tagata valea.

³⁰Kafai e tokagamalie tou mafaufau kae ka malosi foki tou foitino, ka ko te lotomasei e pela mo te masaki ko te kenisa.

³¹Kafai e fakapuapuaga ne koe a tino mativa, ko tena uiga koe e teke ki te Atua tela ne faite ne ia latou; kafai e fai faka'lei ne koe a tino mativa, ko te tapuakiga tafasili i te taua tena a koe.

³²A tino amio masei e aumai foki eiloa ne latou te lotou malaia ona ko olotou amioga masei, ka ko tino amio lei e puipui ne te olotou fakamaoni.[17]

³³A te poto e ola faeloa i mafaufauga o te tagata poto; a tino valea e se iloa ne latou te poto.

³⁴A te amiotonu e fai ne ia te malo ke takutakua; a te agasala e fakatakuvalea ne ia te malo.

³⁵A tupu e fiafia ki ofisa atamai, kae e fakasala ne latou a ofisa kola e se fai olotou tiute.