Read Te Tusi Tapu I Te Gana Tuvalu Lomiga Lua FAATAOTO 16 Bible Online

FAATAOTO 16 - Te Tusi Tapu I Te Gana Tuvalu Lomiga Lua bible

FAATAOTO 16

¹A tatou e taumafai o fai aofaga mo te lei o tatou, ka ko te Atua e fakaiku ne ia a mea katoa.[18]

²E mafaufau koe pela i au mea katoa e fai e tonu katoa, ka ko te Aliki e fakamasino ne ia ou mafaufauga.

³Fakatagi atu ki te Aliki ke fakamanuia mai ne ia au fuafuaga konei e taumafai o fai, kae ka taunu mo te manuia.

⁴A mea katoa ne faite ne te Aliki e isi ne lotou ikuga; a te ikuga o tino amio masei ko te malaia.

⁵A te Aliki e takalialia i tino fakamatamata; ka fakasala eiloa ne ia latou.

⁶Masaua o galue mo te fakamaoni, kae ka fakamagalo ne te Atua au agasala. Fakalogo ki te Aliki kae ka seai se fakalavelave e tupu ki a koe.

⁷Kafai e fakafiafia ne koe te Aliki, kae ka mafai ne koe o fuli mai[19] ou fili ke fai mo ou taugasoa.

⁸E sili atu te lei o mumea kola ne maua ne koe i te auala tonu, i lo mea e uke kola ne maua i se auala se tonu.

⁹E mafai ne koe o fai au fuafuaga, ka ko te Atua e takitaki ne ia au faiga katoa.

¹⁰A te tupu e faipati i tena pule faka te lagi; a ikuga a ia e tonu faeloa.

¹¹A te Aliki e manako ki vaegā fua katoa ke 'tonu katoa, mo te 'togiga foki o mea ke fuafua fakalei ki se togi e malie katoa ei a tino.

¹²A tupu e se mafai o kufaki ne latou ne amioga se lei,[20] me e iloa ne latou me ko te faimeatonu e malosi ei te malo.

¹³A te tupu e manako ki te mea tonu, kae e kau i a latou kola e faipati ne latou te mea tonu.

¹⁴A te tagata poto e taumafai faeloa o fakafiafia te tupu; kafai e kaitaua te tupu, e iku eiloa ki te mate o se tino.

¹⁵A te taliaga a te tupu e pela eiloa mo kaumana kola e aumai ne latou te vaiua i te tau o te muakiga — a te ola e i kona foki eiloa.

¹⁶E sili atu te lei manafai e maua ne koe te poto, i lo aulo mo siliva.

¹⁷A tino amio lei e olo i te auala tela e mao keatea mo te masei; tela la, onoono fakalei ki koga e olo koutou i ei — ka lei tou auala, e sao foki tou ola.

¹⁸A te fakamatamata e iku ki te malaia, a te fiasili e iku ki te se aoga.

¹⁹E sili atu te lotomalalo kae nofo mativa, i lo te kau atu ki tino fiasili ke maua sou vaega i olotou mea kola e kaisoa mai i tino.

²⁰Saga tonu ki akoakoga e avatu ki a koutou kae ka manuia koutou; talitonu ki te Aliki kae ka fiafia koutou.

²¹A te tagata poto kae ko matua tena mafaufau, e iloa fua i tena atamai mo tena malamalama. Kafai e gasolo o gali ana muna, kae gasolo foki o fiafia a tino ki a ia.

²²A te poto se punā vai o te ola ki tino poto; a te taumafai o fakaakoga a tino valea se fakamaumauga fua o taimi.

²³A tino poto e mafaufau muamua ki olotou pati e tau o fai; tela la, a pati e fai ne latou e gasolo eiloa o lei.

²⁴A muna alofa e pela me ne hani e logotonu i te kai kae lei ki te foitino.

²⁵ A te auala tela e mafaufau koe pela me ko te auala tonu, e mafai fua o taki ne ia koe ki te mate.

²⁶A tino galue e galue malosi me e manako ke maua meakai e tausi ei olotou olaga.

²⁷A tino amio masei e salasala ki auala kola e mafai ei o fakapa'kia a nisi tino; ke oko foki eiloa ki olotou muna e ka pela me se afi i te masei.

²⁸A tino amio masei e gutu faitala; e fakatupu ne latou a fakalavelave kae ofa ne latou a va lei o taugasoa.

²⁹A tino fakasaua e fakatogafiti ne latou olotou taugasoa kae taki ne latou ki puapuaga.

³⁰Onoono fakalei ki tino kola e fakamisikata atu kae fakakemo atu olotou mata; a tino pena ko toka mo olotou mafaufauga masei.

³¹A te ola loa ko te taui o tino amiotonu; a te ulu sina ko te kalauna malu tena.

³²E sili atu te tino loto kufaki i lo te tino takutakua. E sili atu manafai e mafai ne koe o pulea a koe eiloa, i lo te pule ne koe o fa'kai lasi e uke.

³³A tino e fakaaoga ne latou te vili ke iloa ei te loto o te Atua, ka ko te Atua eiloa e fai ne ia te tali.