Read Te Tusi Tapu I Te Gana Tuvalu Lomiga Lua FAATAOTO 18 Bible Online

FAATAOTO 18 - Te Tusi Tapu I Te Gana Tuvalu Lomiga Lua bible

FAATAOTO 18

¹A tino kola e se lei te lotou va mo nisi tino e saga fua ki a latou eiloa; e se mafai o loto ki manatu o te tokoukega o tino.

²A te tino valea e pau fua i a ia me e malamalama a ia i te mataupu io me ikai; a tena fakamoemoega taua ke fakaasi tena poto.

³A te agasala mo te masiasi e olo tasi Kafai ko seai sou tulaga fakaaloalogina, ko tena uiga ka faigofie o kote koe ne tino.

⁴A muna e fai ne se tino, e mafai o maua mai i ei te poto, e poko pela mo te moana, kae ma pela me se vaitafe tela e tafe faeloa.

⁵Se faiga se tonu manafai e fakapito se tino ki tino agasala, kae ko se fai ei ne ia te meatonu ki tino amiotonu.

⁶Kafai se tino valea e taumafai o kamata ne ia se kinauga, ko tena uiga a ia e salasala ki se fakalavelave ke oko atu ki a ia.

⁷Kafai e faipati te tino valea, e fakamasiasi fua ne ia a ia eiloa; e lavelavea a ia i ana pati foki eiloa e fai.

⁸A muna fatufatu e logotonu! Tatou e manako katoa ki ei!

⁹A te tagata paie e pau eiloa mo te tagata ofa mea i te masei.

¹⁰A te Aliki e pela me se taoa malosi, te koga tena e olo ki ei a tino amiotonu ke sao latou.

¹¹A tino maumea e mafaufau pela i a latou e puipui ne olotou koloa, e pela me se pui maluga kae malosi tela e puipui ne ia te fa'kai.

¹²E se mafai se tino o fakaaloalogina ne tino, vagana ke fakamalalo a ia; a tino fakamatamata e tu nei i te auala ki te masei.

¹³Fakalogologo muamua koi tuai o fai tau tali. Kafai e se fakalogo mua koe ko tena uiga koe e supa kae valea.

¹⁴A tou loto fia ola e fai ne ia koe ke ola faeloa, i te taimi e masaki ei koe. Kafai ko galo tou loto fia ola, ko tena uiga ko galo atu tou toe fakamoemoega.

¹⁵A tino poto e manako faeloa o tauloto kae akoga.

¹⁶E a, a koe e manako ke fetaui koe mo se tino maluga? A te auala faigofie ke fano koe mo se meaalofa o tuku atu ki a ia.

¹⁷A te tino tela e muamua o faipati i te fono tulafono e mata tonu tena fakamatalaga, kae kafai ko fakafesili atu ne te tagata tela e fakafesagai ki a ia, ko lavea atu ei me e isi ne mea se tonu i tena fakamatalaga.

¹⁸Kafai e fakatau finau a tagata maluga e tokolua i te fono tulafono, a te faiga e tau o fai ki ei ke fai se vili ke iloa ei te ikuga ki te finauga tena.

¹⁹Fesoasoani ki ou kaiga, kae ka puipui ne latou a koe pela me se pui maluga o se fa'kai, kae kafai e fano koe o finau mo latou i se mea, ko tena uiga ka se toe talia eiloa ne latou a koe.

²⁰A ikuga e maua ne koe i au muna e fai, ka nofo eiloa mo koe i tou olaga katoa.

²¹A te muna tela e fai ne koe e mafai o fakasao ne ia tou ola, e mafai foki o fakamasei ne ia; tela la, e tau eiloa o talia ne koe te ikuga o au muna e fai.

²²Kafai ko maua sau avaga, ko maua ne koe te mea tafasili i te lei; e fakaasi mai ei i te Aliki e atafai ki a koe.

²³Kafai e faipati te tagata mativa, e fai eiloa tena akai mo te leo fakaaloalo, kae kafai e faipati te tagata maumea e seai se ava i a ia.

²⁴Nisi vasia fakataugasoa e se mafai o tumau[22] ka ko nisi vasia fakataugasoa e silia atu te olotou fakamaoni i lo te tautaina.