Read Te Tusi Tapu I Te Gana Tuvalu Lomiga Lua FAATAOTO 19 Bible Online

FAATAOTO 19 - Te Tusi Tapu I Te Gana Tuvalu Lomiga Lua bible

FAATAOTO 19

¹E sili atu te tino mativa kae fakamaoni i lo te tino gutu loi kae valea.

²A te tino loto pole kae se atamai e se lei; a te pole vale e mafai o ave ne ia koe ki koga e tupu ei fakalavelave.

³E isi ne tino e fakamasei ne latou a latou eiloa i olotou uiga valea, kae ka oti aka, ko lou ei ne latou me ko te Aliki ne pogai ei te lotou masei.

⁴A tino maumea e maua faeloa olotou taugasoa, ka ko taugasoa o tino mativa e se mafai o tumau.

⁵Kafai e fai ne koe se fakamatalaga loi i te fono tulafono, a koe e fakasala. Seai eiloa se auala e mafai o sao ei koe.

⁶A tino katoa e taumafai ke lei olotou va mo tino maluga; a tino katoa e manako ke taugasoa latou mo tino kola e tufa sale olotou mea.

⁷A taina o te tagata mativa e se fia saga mai eiloa ki a ia; setioa o seai ne ona taugasoa. Me e pefea eiloa tena taumafai ke maua ne ona taugasoa, kae e se mafai eiloa o maua.

⁸Tauloto a mea katoa e mafai ne koe o tauloto, ko tou fesoasoani tena ki a koe eiloa; kafai e masaua ne koe au mea ne tauloto kae ka maumea koe.

⁹So se tino tela e faipati ne ia se tala loi i te fono tulafono e se mafai o sao mai i te fakasalaga; ko malaia eiloa a ia.

¹⁰A tino valea e se tau o ola i se olaga maumea, pela foki a pologa e se tau o pule ne latou a tino maluga.

¹¹Kafai koe se tagata atamai, e mafai eiloa ne koe o taofiofi tou kaitaua. Kafai e isi se tino ne fai ne ia se mea se ki a koe, kae se saga koe ki ei, ko tena uiga ko maua ne koe te mea tafasili i te taua.

¹²A te kaitaua o te tupu e pela eiloa mo te gulu o te leona, ka ko tena atafai e pela eiloa me se vaiua logomalie.

¹³A te tamaliki tagata valea e fakamasiasi ne ia tena tamana, ka ko te fafine gutu kotekote e pela me se motimotiga o te vai.

¹⁴E mafai o avatu ne matua ne fale mo tupe ki tena tama tagata, ka ko te Aliki fua e mafai ne ia o avatu ki ei se avaga atamai.

¹⁵A te tagata paie e moe faeloa, kae e iku eiloa ki te fiakai.

¹⁶Tausi ki tulafono a te Atua kae ka ola leva koe; kafai e se saga koe ki ei ko koe ka mate.

¹⁷Kafai e avatu ne koe ne mea ki tino mativa, e pela eiloa me se mea e tuku atu ne koe ki te Aliki, tela la, e toe taui mai ne te Aliki ki a koe e tusa eiloa mo tou aga'lei.

¹⁸Taumafai o akoako fakalei au tamaliki i te taimi koi foliki ei, kae koi mafai foki ne latou o tauloto. Kafai e se fai ne koe, ko tena uiga e fai ne koe ke masei olotou olaga.[23]

¹⁹Kafai e isi se tino e vave kaitaua, tuku eiloa ke fepaki mo fakalavelave. Kafai e aumai ne koe a ia keatea mai i fakalavelave i se taimi, ko tena uiga e toe fai foki ne koe pena i se taimi.[24]

²⁰Kafai e fakalogo koe ki manatu fakatonutonu, kae loto fiafia o tauloto, kae ka maua ne koe te poto i se aso.

²¹A tino e fai olotou vaega fuafuaga e uke mo aso fakamuli, ka ko te loto o te Aliki e fai eiloa.

²²E fakamasiasi te kai manako; [25]e lei atu a tino mativa i lo tino loi.

²³Fakalogo ki te Aliki kae ka ola leva koe, ka tokagamalie tou olaga kae sao mai fakalavelave.

²⁴E isi ne tino ko to lasi te paie ko se maua eiloa ne latou o tuku meakai ki olotou gutu.

²⁵A tino fakamatamata e tau o fakasala, ko te mea ke se toe fai ne latou te amioga tena. Kafai koe se tagata poto, e talia eiloa ne koe ke fakatonu atu ne se tino au mea se ne fai, kae saga tonu foki koe o tauloto a mea kona.

²⁶A te tino e fai fakamasei ne ia tena tamana kae afuli keatea tena matua mai i tena fale, se tino se alofa kae masei.

²⁷Taku tama, kafai ko se saga koe o tauloto, kae ka toe puli i a koe a mea ne iloa muamua ne koe.

²⁸Kafai se molimau e taumafai o fakamasei te sua tino, ko tena uiga e faigata o isi se mea tonu i te koga tena. A tino amio masei e fiafia ki amioga masei.

²⁹A te tagata valea e tau o kini.