Read Te Tusi Tapu I Te Gana Tuvalu Lomiga Lua FAATAOTO 2 Bible Online

FAATAOTO 2 - Te Tusi Tapu I Te Gana Tuvalu Lomiga Lua bible

FAATAOTO 2

¹Taku tama, tauloto fakalei a mea konei e akoako atu ne au ki a koe, kae sa puli a mea e fai atu ne au ke fai ne koe.

²Fakalogo ki muna o te poto, kae taumafai ke malamalama koe i ei.

³E tonu, akai atu ke maua ne koe te poto; fakamolemole atu ke maua ne koe te atamai.

⁴Sala malosi ki te poto, e pela manafai e sala koe ki siliva io me ko se koloa tāua.

⁵Kafai e fai ne koe te mea tena, kae ka iloa foki ei ne koe te uiga o te mataku ki te Aliki, kae ka manuia eiloa koe i tau taulotoga e uiga ki te Atua.

⁶Ko te Aliki e aumai ne ia te poto; a te atamai mo te malamalama e o'mai katoa mai i a ia.

⁷E fesoasoani kae puipui ne ia tino fakamaoni kae amiotonu.

⁸E puipui ne ia a tino kola e fai fakalei ki nisi tino, kae tausi ne ia a tino kola e tavini fakamaoni ki a ia.

⁹Kafai e fakalogo mai koe ki a au, kae ka iloa ne koe te mea tonu, faiga tonu, mo uiga tonu. Ka iloa foki ne koe a mea e tau o fai ne koe.

¹⁰Ka gasolo foki ei koe o poto, kae ka fiafia koe i a koe e poto.

¹¹A tou atamai mo tou malamalama ka puipui ne ia koe,

¹²ke mo a e fai ne koe te mea 'se. Ka fakamao ne latou a koe mai i tino fakatupu taua i olotou muna e fai,

¹³ko tagata kona kola ko oti ne tiaki te olaga tonu kae ola i se olaga pouliuli o te agasala,

¹⁴ko tagata kona e fiafia o fai a amioga masei,

¹⁵ne tagata e se mafai o fakatuagagina.

¹⁶Ka mafai ne koe o teke atu te fafine masei tela e taumafai o fakapakū koe ki ana muna molemole,

¹⁷tela e se fakamaoni ki tena avaga kae fakapuli fua ne ia ana tautoga malu ne fai.

¹⁸Kafai e fano koe ki tena fale, a koe ko sasale i te auala ki te mate. A te fano o koe ki kona, ko pau eiloa mo te fano ki te lalolagi o tino mate.

¹⁹A tino katoa kola ne olo ki ei, e seki ai eiloa se tino kai foki mai. E seai se tino e toe foki mai ki te auala o te ola.

²⁰Tela la, e tau eiloa koe o tautali i faiga a tino amiotonu, kae ola i se olaga fai mea tonu.

²¹A tino amiotonu kae fai mea tonu ka ola i te fenua tenei.

²²Ka ko te Atua ka tapale keatea ne ia a tagata amio masei mai i te fenua, kae unu keatea a tino agasala, e pela me ne lakau e unu keatea mai i te laukele.