Read Te Tusi Tapu I Te Gana Tuvalu Lomiga Lua FAATAOTO 21 Bible Online

FAATAOTO 21 - Te Tusi Tapu I Te Gana Tuvalu Lomiga Lua bible

FAATAOTO 21

¹A te Aliki e fakatonutonu ne ia a te mafaufau o te tupu, e pela eiloa mo te fakatonu ne ia te auala e tau o tafe ki ei se vaitafe.

²E isi ne taimi e leake nei koe i au mea e fai e tonu, kae masaua i te Aliki e fakamasino ne ia ou mafaufauga.

³Fai te mea tonu kae lei; a te Aliki e fiafia ki te mea tena i lo te aumai o taulaga ki a ia.

⁴A tino amio masei e takitakigina ne olotou uiga masei kae fakamatamata; a te mea tena se agasala.

⁵Fai fakalei au aofaga kae ka uke au mea; kafai e sona gasue fakavave fua koe, e se mafai o uke au mea.

⁶A te koloa e maua ne koe i faiga se tonu, e vave galo atu fua, kae ko oti ei ne taki ne latou koe 'ke pili ki te mate.

⁷A tino amio masei ko malaia eiloa i olotou uiga fakasaua; e se manako o fai te mea tonu.

⁸A tino agasala e sasale i auala pikopiko; a tino amiotonu e fai ne latou te mea tonu.

⁹E sili atu te nofo o koe i te tuafale o se fale, i lo te nofo fakatasi mo tau avaga gutu kotekote i loto i te fale.

¹⁰A tino amio masei e manako faeloa o fai amioga masei; e seai se tino e alofa latou ki ei.

¹¹Kafai ko fakasala se tagata valea, ka maua ei se akoakoga ki tino, ke oko foki eiloa ki te tino se mafaufau. Ka ko te tagata poto ka tauloto ne ia a mea ne akoako atu ki a ia.

¹²A te Atua fai mea tonu, e iloa ne ia a mea e tupu i fale o tino amio masei, kae ka aumai ne ia a tino amio masei ke ta fakamasei.

¹³Kafai koe e se fiafia o fakalogo ki fakatagi a tino mativa, ko tena uiga a tau tagi mō se fesoasoani, e se mafai o lagona.

¹⁴Kafai se tino e kaitaua ki a koe, taumafai o ave funa ki ei se meaalofa, ko te mea ke filemu tena loto.

¹⁵Kafai ko fai te mea tonu, kae fiafia a tino amio lei, ka ko tino amio masei ka fanoanoa.

¹⁶A te mate e fakatalitali mai ki so se tino tela e kalo keatea mai i te mafaufauga lei.

¹⁷A te tino e fiaola i se olaga maumea, o inu i uaina, kae kai ki meakai gali — e se mafai ne mea kona o fai te tino tena ke maumea.

¹⁸A tino amio masei e aumai fua ne latou ki a latou eiloa a puapuaga kola e taumafai latou o fakaoko ki tino amio lei.

¹⁹E sili atu tou nofo i te toafa, i lo te nofo o koe mo tau avaga gutu kotekote kae gutu muimui.

²⁰A tino poto e nofo i te olaga maumea kae gali, ka ko tino valea e vave oti fua olotou tupe ne fakaaoga valevale.

²¹Taumafai ke maua ne koe te loto alofa kae fai mea tonu, kae ka ola leva koe; ka fakaaloalogina koe ne tino kae fai fakalei ne latou a koe.

²²A te takitaki atamai e mafai o puke ne ia a te fa'kai tela e pulu ne tagata malosi, kae ofa ne ia a pui kola e fakalagolago ki ei latou.

²³Kafai koe e manako ke mao keatea mo fakalavelave, masaua la o fakaeteete i au muna e fai.

²⁴Fakaasi mai ki a au se tino valea, kae ka fakaasi atu ne au te tino amio fakamatamata kae seai se mafaufau.

²⁵A te tagata paie kae ita ma galue e fai fua ne ia a ia ke mate;

²⁶a tena mea e fai i taimi katoa ko te mafaufau ki mea e manako ki ei. A te tagata amiotonu e mafai o tufa atu ana mea mo te loto alofa.

²⁷A te Aliki e se fiafia ki tino amio masei kola e ofo atu olotou taulaga kae isi ne fakamoemoega masei i olotou loto.

²⁸A te molimau a te tagata gutu loi e se mafai o talitonu ki ei a tino, ka ko te muna a te tagata mafaufau e talia gofie ne tino.

²⁹A tino amiotonu e talitonu i a latou e lei, ka ko tino amio masei e taumafai o fai pela i a latou ko oko eiloa i te maluga.

³⁰A te poto, te atamai mo te mafaufau faka te tagata e seai se aoga manafai te Aliki e se fiafia ki a koe.

³¹E mafai ne koe o aumai a solofanua o fakatoka mō se taua, kae ko te Aliki eiloa e aumai ne ia te manumalo.