Read Te Tusi Tapu I Te Gana Tuvalu Lomiga Lua FAATAOTO 23 Bible Online

FAATAOTO 23 - Te Tusi Tapu I Te Gana Tuvalu Lomiga Lua bible

FAATAOTO 23

¹Kafai e kai fakatasi koulua mo se tagata maluga, ke mo a eiloa e puli i a koe a te tulaga o te tagata tena.[26]

²Kafai koe e fiakai malosi eiloa, masaua o sa to kai malosi.

³Sa kaimanako ki meakai kona e aumai ne ia; se iloa fua i te mea manafai e taumafai o fakatogafiti koe.

⁴A koe ke atamai o se sona fakafita tou foitino i tou taumafai ke maumea koe.

⁵Au tupe e mafai faeloa o galo atu pela me se lapaga o se uila, e pela me ne tupu ake ona kapakau ko te mea eiloa ko eva atu e pela me se aeto.

⁶Sa fano o kai i te taipola a te tagata amio masei, io me manako ki meakai gali kola e laulau ne ia.

⁷E fai aka ana muna penei, “Vau o toe asu atu ne au mea,” kae tela la e se ko tena kano loto katoa tena. A ona mafaufauga e fakatau ifo eiloa ki a ia.

⁸Ka toe luaki mai ne koe au mea katoa kola ne kai, tela la, ko maumau au muna taua katoa kola ne fai ki a ia.

⁹Sa taumafai o fai ne pati aoga ki se tino valea; e se mafai o iloa ne ia te aoga o muna kona.

¹⁰Ke mo a eiloa e siki ne koe se tuakoi taumua, io me fao se manafa o tamaliki seai ne matua.

¹¹A te Aliki e puipui ne Ia a tino pena, kae e kinau eiloa a ia mō te lei o tino fakaalofa pena.

¹²Saga tonu ki tou faiakoga, kae taumafai o tauloto a mea katoa kola e mafai ne koe e tauloto.

¹³Masaua o akoako fakalei a tamaliki. A te kini mo te mafaufau e se mate i ei te tamaliki,

¹⁴kae e mafai o fakasao ei tena ola.

¹⁵Taku tama, kafai e maua ne koe te poto kae ka fiafia malosi eiloa au.

¹⁶Ka fakamatamata au manafai e lagona ne au a koe e faipati ki muna o te poto.

¹⁷Sa saga o lotomasei ki tino agasala; taumafai ke fakasilisili ne koe i tou olaga a te fakaava ki te Aliki.

¹⁸Kafai e fai ne koe pena, kae ka manuia koe i aso fakamuli.

¹⁹Taku tama, kiloke, a koe ke atamai kae mafaufau fakalei ki tou olaga.

²⁰Sa takaga ki tino inu malosi ki uaina, io me ko tino gafula.

²¹A tino inu kava mo tino gafula e iku ki te mativa. Kafai tau mea e fai ko te kai kae moe i taimi katoa, e se leva ko koe eiloa ko pei ki gatu masaesae.

²²Fakalogo ki tou tamana, moi seai a ia e penei seai foki koe. Kafai ko lomatua tou matua, masaua o atafai fakalei ki ei.

²³A te muna tonu, te poto, te tauloto mo te mafaufau lei — a mea kona ne mea tafasili i te aoga, e tau ke maua ne koe, faitalia me e pefea te mafa o te togi. Kae masaua me e lasi te aoga o mea kona ki a koe, tela la, e se tau o togi atu ne koe ki se tino.

²⁴A te tamana o te tino amiotonu e tau eiloa o fiafia. A te tamaliki poto e fakafiafia ne ia tena tamana.

²⁵Taumafai ke fakafiafia ne koe tou tamana mo tou matua; tena te mea e tau o avatu ne koe ki tou matua.

²⁶Taku tama, saga tonu mai, ke fai toku olaga mo akoakoga ki a koe.

²⁷A fafine tali tagata mo fafine agasala e pela me ne malei fakamataku.

²⁸E fakatalitali ki a koe e pela me ne tino faomea, kae e pogai mai i a latou te se fakamaoni o tagata e tokouke.

²⁹Fakaasi mai se tino tela e inu kava malosi, tela e tofotofo faeloa ne ia a vaega o meainu fou, kae ka fakaasi atu ne au te tagata ola fi'ta, kae fanoanoa faeloa i a ia eiloa, e fakatupu fakalavelave faeloa kae muimui faeloa i taimi katoa. A ona mata e kula e pela me ne toto, kae pakiakia valevale tena foitino, ne pakiaga ne mafai faeloa o se maua ne ia moi fai pela a ia se tino mafaufau.

³¹Ke mo a e talia ne koe te uaina ke fakaosoosogina ei koe, e ui eiloa e kula gali mai, kae malapu i te ipu, kae ulu lei ki loto i te tinae.

³²Ka taeao ake, ka pau eiloa koe me se tino ne u ne se gata poisini.

³³Ka sae mai ne ata fai fakaatea i ou mua, kae ka se mafai ne koe o mafaufau io me faipati fakalei.

³⁴Ka pela koe me se tino e fano i te vasa, e taitailua, kae ti valevale i luga i te vakamutu.

³⁵Ka fai aka au muna penei, “Au pela me ne poko i se mea, au pela me ne kini ne se tino kae ko se masaua ne au. Ai a ko se mafai ei ne au o ala aka ki luga? Kaati e tau o toe aumai saku meainu.”