Read Te Tusi Tapu I Te Gana Tuvalu Lomiga Lua FAATAOTO 24 Bible Online

FAATAOTO 24 - Te Tusi Tapu I Te Gana Tuvalu Lomiga Lua bible

FAATAOTO 24

¹Sa lotomasei ki tino amio masei, kae sa taumafai o fai takaga ki a latou.

²E mafaufau faeloa latou ki te fakatupuga o fakalavelave; so se taimi eiloa e fai ei se taupulega a latou, e iloa eiloa me ka iku o tupu se fakalavelave ki se tino.

³A kaiga e tau o fakavae ki te poto mo te malamalama. [27]

⁴A potu e teu fakagaligali ki teuga gali, e iloa ei me e isi ne tino atamai e nofo i kona.

⁵E sili atu te poto i lo te malosi;[28] ao, e sili atu te poto i lo te malosi.

⁶Kafai koe e fano ki te taua, e muamua koe o fakatoka au aofaga, tela la, kafai e uke a manatu fakatonutonu ne maua ne koe, ko tena uiga e faigofie o maua ne koe te manumalo.

⁷A muna o te poto e faigata o malamalama i ei a tino valea. E seai ne ona manatu e mafai o fai manafai ko faipatigina a mataupu taua.

⁸Kafai e fai faeloa ne koe a aofaga masei, ka taku koe ne tino se tino fakatupu fakalavelave.

⁹So se aofaga e fakatoka ne se tino valea se aofaga masei. A tino e se fiafia ki tino gutu kotekote.

¹⁰Kafai koe e vaivai i te taimi e tupu ei se fakalavelave, ko tena uiga a koe e vaivai eiloa.

¹¹Fakavave o fakasao te tino tela ka tamate i se feitu se tonu.

¹²E mafai koe o fai pela me e seai sau fekau i te mea tena, kae masaua i te Atua e iloa ne ia ou mafaufauga, kae fakamasino foki ne ia. E onoono fakalei eiloa a ia ki a koe; e iloa ne ia a mea katoa. Ka taui atu ne ia ki a koe e tusa eiloa mo au mea ne fai.

¹³Taku tama, kai ki te hani me e gali. E pela eiloa mo te hani e logotonu ki tou laulaufaiva,

¹⁴e pena foki te poto e lei mo tou olaga faka-te-agaga. Kafai e maua ne koe te poto kae ka manuia tou olaga i aso fakamuli.

¹⁵Sa fai pela mo tino amio masei kola e fai olotou aofaga o fao a mea a tino amiotonu io me ave keatea ne latou olotou fale.

¹⁶Faitalia me e pefea te uke o taimi e puapuaga ei te tagata amiotonu, kae e toe fakaolagina eiloa a ia, ka ko tino amio masei e fakamalaiagina i mala.

¹⁷Sa fiafia manafai ko puapuaga tou fili, sa fiafia foki manafai ko paku.

¹⁸E iloa eiloa ne te Aliki manafai koe e fakatauemu, ka se fiafia a ia ki te mea tena, kae mafai faeloa o se fakasala ne ia a te tagata tena e fai fili mo koe.

¹⁹Sa fakafita o mafaufau mafa ki mea e fai atu ne tino masei; sa lotomasei ki a latou.

²⁰A te tino amio masei e seai sena mea lei e fakamoemoe ki ei mo aso fakamuli.

²¹Taku tama, mataku ki te Aliki kae fakaaloalo ki te tupu. Ke moa eiloa koe e fakapiki ki tino kola e teke ki te Aliki io me ki te tupu;

²²a tino pena e vave malaia fua. E a, e iloa ne koe te mafa o te malaia tela e mafai o aumai ne te Atua io me ko te tupu ki se tino?

²³Konei foki a nisi muna ne fai ne tagata poto: A te famasino e se tau o fapito.

²⁴Kafai e fakasao ne ia a te tino agasala i te taimi o te fakamasinoga, ko tena uiga ka se fiafia a tino ki a ia.

²⁵A famasino kola e fakasala ne latou a tino fai agasala, e takulei ne tino kae ka manuia foki olotou olaga.

²⁶A te tali tela e fai mo te loto fakamaoni se fakailoga o te alofa tonu.

²⁷Sa faite muamua tou fale mo tou kaiga, vagana ke toka mua au fatoaga kae ko talitonu foki koe me ko mafai o lava ne mea e maua ne koe mo tausi te olaga.

²⁸Sa sona fai sau molimau se lei e uiga ki te sua tino, kae seai se pogai tau, io me fai ne koe ne tala se tonu e uiga ki a ia.

²⁹Ke mo a eiloa e faipati koe penei, “Ka fakaoko ne au ki a ia a te mea ne fai mai ne ia ki a au! Ka taui ne au tena mea masei ne fai mai ki a au!”

³⁰Au ne sasale i loto i fatoaga mo togāvine a te tagata paie kae valea.

³¹Ko fonu faka eiloa i lakau makaikai mo mouku ko oko eiloa i te loa. A te pui fatu tela e pui ei ko maofa ki lalo.

³²Ne kilokilo atu au ki te mea tena, mafaufau au ki ei, maua ei ne au se akoakoga mai i ei:

³³ Moe, pilima ou lima kae fakamalolo malie,

³⁴kae i te taimi e moe ei koe, ka vau te mativa o ta koe pela me se tino faomea.